Austria i kërkon BE-së 600 milionë euro për refugjatët

Austria ka kërkuar nga Bashkimi Evropian një dëmshpërblim prej 600 milionë euro për numrin e madh të refugjatëve që ajo është detyruar të strehojë, shkruajnë mediet austriake. Gjatë vitit 2015 ky vend kishte strehuar 90 mijë refugjatë dhe ky numër kaq i madh i ka shkaktuar një kosto të madhe shtetit të Evropës Qendrore.

Austria e ka formuluar këtë kërkesë në një letër që ia ka drejtuar shefit të Komisionit të BE-së Jean-Claude Juncker, transmeton albinfo.ch. Kjo letër i është dërguar atij nga fundi i janarit të këtij viti.

Në letër, ministri austriak i financave Jörg Schelling kërkon po ashtu shtimin e fondit evropian për azil, migracion dhe integrim. Mjetet nga ai fond do të duhej t`u ndaheshin shteteve evropiane më të prekura nga kriza e refugjatëve.