Zvicra, vendi i katërt në botë për nga niveli i demokracisë

Para Zvicrës në këtë ranglistë janë vetëm shtetet skandinave: Norvegjia, Suedia dhe Finlanda

Një hulumtim i bërë nga organizata amerikane për të drejtat e njeriut „Freedom House” dhe Human Development Index e OKB-së, Zvicra ka zënë vendin e katërt në listën e vendeve më demokratike në botë. Para Zvicrës në këtë ranglistë janë vetëm shtetet skandinave: Norvegjia, Suedia dhe Finlanda, shkruan gazeta Tages Anzeiger.

Krahasuar me ranglistën e fundit, Zvicra është ngritur një shkallë më lartë, duke i zënë kështu vendiun Danimarkës. Niveli i ngritur i demokracisë zvicerane sipas kësaj rangliste dëshmohet edhe me zvogëlimin e diferencës së saj krahasuar me Finlandën që zë vendin e tretë. Kjo diferencë është vetëm 0.4 pikë nga 1.8 pikë sa ishte më parë.

Hulumtimi është bazuar në të dhënat e viteve 2008-2009. Ai ka konstatuar se Zvicra, me 2.66 pikë, ka bërë përparimin ndër më të mëdhenjtë në mesin e njëzet vendeve demokratike të krahasuara. Vetëm Uruguai ka shënuar përparim proporcioonalisht më të madh.

Ndërkaq, në mesin e 10 vendeve më demokratike bën pjesë vetëm një vend jo evropian. Bëhet fjalë për Zelandën e re, që gjendet në vendin e gjashtë. Gjermania në këtë ranglistë radhitet e dhjeta ndërsa SHBA – e pesëmbëdhjeta.

Lista bazohet në indikatorët si: politika, gjinia, ekonomia, shkenca, shëndetësia dhe ambienti.