Europol godet kartelin ballkanik të drogës, 12 persona në pranga

Më 15 prill, Europol ka mbështetur autoritetet e Malit të Zi në një operacion të gjerë kundër një grupi të organizuar kriminal në Ballkan, i dyshuar për trafik ndërkombëtar droge.

Në të njëjtën kohë, agjencia ka asistuar edhe autoritetet gjermane në hetimet që lidhen me persona të përfshirë në këtë rrjet.

Sipas njoftimit, gjatë aksionit janë arrestuar gjithsej 12 persona, përfshirë katër në Gjermani. Në mesin e tyre ndodhet edhe një person i konsideruar objektiv me rëndësi të lartë, i kapur në Mal të Zi.

Hetimet, të mbështetura gjithashtu nga Austria dhe Spanja, janë përqendruar në një organizatë kriminale që merrej me trafikimin në shkallë të gjerë të kokainës dhe kanabisit. Të dyshuarit, që jetonin kryesisht në Mal të Zi dhe Gjermani, dyshohet se kishin role të ndryshme në këtë rrjet, duke përfshirë financimin, koordinimin dhe logjistikën.