Zvicra shton eksportin dhe importin

Eksportet e Zvicrës janë rritur për 7 për qind me gjithë rrethanat e vështira, të shkaktuara nga forcimi i frangut

Zvicra, në vitin që shkoi ka eksportuar më shumë mallra krahasuar me një vit më parë.

Siç ka bërë të ditur administrata doganore e shtetit, eksportet e Zvicrës janë rritur për 7 për qind dhe kjo, në kushtet e vështira, të shkaktuara nga forcimi i frangut.

Gjatë vitit 2010 Zvicra ka eksportuar mallra në vlerë prej 193.3 miliardë frangash, shkruan 20 minuten.ch. Por, me gjithë ngritjen e shënuar, vlera e eksportit të Zvicrës vazhdon të jetë për 13 miliardë më e ulët se ajo e vitit rekord, 2008.

Gjatë të njëjtës periudhë, importet e Zvicrës kanë shënuar rritje prej 8 për qind. Bëhet fjalë për mallra të huaja në vlerë prej 173.7 miliardë frangash që kanë hyrë në Zvicër.