Zvicra nuk i pranon më pasaportat ruse nga territoret e okupuara

Dokumentet përkatëse të udhëtimit nuk lejohen më për lëshimin e vizave dhe për kalimin e kufijve të jashtëm të Shengenit.

Zvicra nuk i njeh më dokumentet e reja ruse të udhëtimit për njerëzit nga territoret e okupuara të Ukrainës dhe nga republikat separatiste të Osetisë së Jugut dhe Abkhazisë në Gjeorgji, transmeton albinfo.ch. Kështu, Këshilli Federal po ndjek një vendim të BE-së që ishte marrë në dhjetor të vitit 2022.

Sipas njoftimit të së mërkurës, dokumentet përkatëse të udhëtimit nuk lejohen më për lëshimin e vizave dhe për kalimin e kufijve të jashtëm të Shengenit.

Zvicra, si anëtare e Shengenit, ishte e detyruar ta miratonte këtë pasazh.

Cilat përjashtime janë të mundshme

Komisioni i BE-së përcakton se cilat dokumente udhëtimi të lëshuara pas një date të caktuar nuk do të pranohen më. Përjashtimet janë të mundshme nëse mbajtësit e dokumenteve të udhëtimit ishin tashmë shtetas rusë përpara datës së përfundimit, si dhe për pasardhësit e tyre, shkruan sda.ch. Përjashtimet lejohen edhe për të miturit dhe personat juridikisht të paaftë.

Në shtator, Rusia kishte deklaruar se rajoni i Zaporizhia-s, së bashku me rajonet Cherson, Donetsk dhe Luhansk, pas referendumeve të rreme, do të aneksoheshin nga ajo, përcjell albinfo.ch. Si rezultat, Komisioni i BE-së propozoi që të mos njiheshin pasaportat e lëshuara atje. Autoriteti e ka bërë të qartë në atë kohë se pothuajse të gjitha shtetet anëtare po e bënin tashmë këtë veprim.

---