Zvicër: Vërshimet bllokojnë rrugët dhe hekurudhat

Sipas meteorologëve, këto probleme janë shkaktuar nga një front i ngrohtë që ka arritur Zvicrën në natën në mes të të shtunës dhe të dielës

Në regjionet Berner Oberland, Walis dhe në Zvicrën qendrore, pas të reshurave të shumta, të hënën kanë dalë nga shtretërit e tyre shumë përrenj dhe lumenj, duke vërshuar kështu shumë rrugë dhe vija hekurudhash. Disa nga linjat, për pasojë, mbeten të bllokuara për një kohë më të gjatë.

Kështu, në Berner Oberland është ndaluar qarkullimi në linjën hekurudhore Zweilütschinen- Lauterbrunnen. Deri në zhbllokim, pasagjerët do të barten me autobusë, bën të ditur swissinfo.ch.

Në trafikun rrugor gjatë ditës disa lokalitete nuk kanë qenë të arritshme ndërsa gjendja është normalizuar në orët e mbrëmjes. Vazhdon të mbetet i shkëputur nga bota fshati kandersteg në Berner Oberland, pasi që lumi Kander ka vërshuar dhe depërtuar nëpër tunelin që shërben për mbrojtje nga ortiqet.

Sipas meteorologëve, këto probleme janë shkaktuar nga një front i ngrohtë që ka arritur Zvicrën në natën në mes të të shtunës dhe të dielës.