Zvicër, pasoja të rënda të vërshimeve

Masa e ujërave që vërshuan, thuhet të ketë qenë edhe më e madhe se ajo e vërshimeve të vitit 2005

Pasojat e reshjeve të djeshme më së shumti i kanë ndjerë regjionet si Berner Oberland, Valis, dhe disa pjesë të Zvicrës qendrore. Në berner Oberland vërshimet kanë shkaktuar dëme të mëdha materiale, duke shkatërruar shtëpi dhe pasuri, njoftojnë mediet zvicerane.

Masa e ujërave që vërshuan, thuhet të ketë qenë edhe më e madhe se ajo e vërshimeve të vitit 2005 që konsideroheshin më të fuqishmet e viteve të fundit.

Shumë banorë të lokaliteteve Mitholz Kandersteg dhe disa fshatrave tjerë, janë detyruar të evakuohen nga vendbanimet e tyre, disa syresh edhe përmes helikopterëve.

Rruga dhe hekurudha që shpien në Kandersteg vazhdojnë të jenë të bllokuara dhe kjo shkakton bllokimin edhe për dërgesat në Valis.

Vërshime ka pasur edhe në Zvicrën qendrore, respektivisht në regjionin Engelberg dhe rreth liqenit Vierwaldstättersee.

Sot në mëngjes kanë filluar punimet për sanimin e dëmeve, me ç`rast është angazhuar edhe ushtria .