Vërshimet marrin tagrin e tyre dhjetëramilionësh

Vetëm dëmet e shkaktuara në rreth 300 shtëpi, vlerësohen më shumë se dhjetë milionë franga

Vërshimet që kishin kapluar të hënën regjionin Berner Oberland kanë dëmtuar rreth 300 ndërtesa. Kompanitë ku këto ndërtesa ishin të siguruara vlerësojnë se dëmet e shkaktuara arrijnë në më shumë se dhjetë milionë franga.

Kjo shumë është e përafërt dhe mbështetet në përvojat e vërshimeve të mëparshme, ka thënë për mediet zvicerane një zëdhënëse e kompanisë që siguron ndërtesat në Kantonin e Bernës.

Nga njëqind shtëpi ose ndërtesa tjera janë dëmtuar në komunat Kandergrund dhe Frutigen, ndërsa në Kandersteg 40 sish.

Por dëmtime të rënda ka pësuar edhe infrastruktura. Ndërmarrja hekurudhore BLS vlerëson se infrastruktura e saj ka pësuar dëme në vlerë prej 5 deri 6 milionë frangash.

Disa miliona franga do të kushtojë po ashtu edhe meremetimi i rrugëve të dëmtuara nga vërshimet e fillimit të javës në regjionin e Bernës.