Policia e Kosovës, marrëveshje bashkëpunimi me atë të New Yorkut

Drejtori i Policisë së Kosovës, Rashit Qalaj, i shoqëruar nga stafi i tij po qëndrojnë për një vizitë zyrtare në Shtetet e Bashkuara të Amerikës, ku kanë realizuar takim me Komisarin e Policisë së New Yorkut, James P. O’Neill, si dhe kanë realizuar vizita në Akademinë Policore, transmeton albinfo.ch.

Qalaj dhe O’Neill kanë nënshkruar një memorandum bashkëpunimi, i cili vlerësohet si i pari me vendet e Ballkanit.

Me këtë marrëveshje synohet vendosja e bashkëpunimit sa më cilësor, në shkëmbimin e informacioneve policore, në luftën kundër krimit të organizuar, krimit trans-kufitar, parandalimin e kriminalitetit, veçanërisht në format komplekse të krimit të organizuar.
“Kjo vizitë disaditore është e një rëndësie të veçantë dhe ka për qëllim vazhdimin e avancimit të bashkëpunimit ndërpolicor ndërmjet dy vendeve, si dhe intensifikimin e marrëdhënieve policore me interes të përbashkët”, ka deklaruar Qalaj.