Pas korrigjimit: SBB, nga vendi i dytë bie në vendin e njëmbëdhjetë në Evropë

Ekspertët kishin bërë një gabim të rëndë me informacionin e SBB-së: për Zvicrën janë përdorur gjysmëtarifat (Halbtax) dhe jo tarifat e plota

Një renditje e bërë nga fillimi i dhjetorit kishte konstatuar se SBB kishte çmime veçanërisht të lira në krahasim me vendet e tjera evropiane. Tani OJQ-së që kishte bërë listimin në fjalë iu desh të rregullonte atë, transmeton abinfo.ch. Pas korrigjimit të gabimeve, Zvicra është në vendin e 11-të.

OJQ-ja Transport and Environment (T&E) qëndron prapa anketës. Sipas saj, vetëm në Itali udhëtimet me tren janë më të lira, kishte njoftuar ajo në fillim të muajit, shkruan srf.ch. Por OJQ-së tani ju desh ta korrigjonte këtë deklaratë.

Arsyeja për këtë është me sa duket një gabim në llogaritje. T&E kishte marrë parasysh tetë kritere për vlerësimin. Çmimeve të biletave u ishte dhënë pesha më e madhe. Mirëpo, ekspertët kishin bërë një gabim të rëndë me informacionin e SBB-së: për Zvicrën janë përdorur gjysmëtarifat (Halbtax) dhe jo tarifat e plota.

Në renditjen e korrigjuar, Zvicra bie nëntë vende më poshtë, gjegjësisht në vendin e 11-të. Shërbimi ndërkombëtar Eurostar zë vendin e fundit – për shkak të kostove të larta në rrugën e Eurotunelit midis Londrës dhe disa qyteteve evropiane.

Një ngushëllim i vogël për SBB: ajo ishte megjithatë në gjendje të ruante vendin e parë në kategorinë e besueshmërisë.

---