Flet heroi i Spanjës

Me golin e tij në shtesë, Ferran Torres u kthye në heroin e finales, duke i dhënë Spanjës fitoren 1-0 ndaj Argjentinës dhe titullin e dytë kampion bote në histori

Autori i golit që i dha Spanjës Kupën e Botës 2026, Ferran Torres, nuk e fshehu emocionin pas finales së fituar ndaj Argjentinës, duke ia dedikuar suksesin të gjithë popullit spanjoll.

Sulmuesi i “La Roja”, i cili realizoi golin vendimtar në minutën e 106-të, deklaroi se triumfi ishte i shkruar dhe se ky sukses i përket gjithë vendit.

“Mendoj se në fund ky gol nuk është i imi, por i 47 milionë spanjollëve. Fati ishte shkruar, ishte e destinuar që ne ta fitonim këtë Kupë Bote”, u shpreh Ferran Torres për La 1, transmeton albinfo.ch.

Torres pranoi se finalja ishte jashtëzakonisht e vështirë, sidomos përballë një skuadre si Argjentina, që kishte në fushë Lionel Messin.

“Të gjitha finalet janë të vështira, por kur përballë ke Messin, gjithmonë ndjen atë nervozizëm. Megjithatë, ne u përqendruam te loja jonë dhe e treguam edhe një herë forcën tonë.”

Duke folur për golin që i dha Spanjës titullin botëror, sulmuesi tha se ai përfaqësonte një çlirim të madh pas kritikave që kishte marrë gjatë turneut.

“Ishte një çlirim i madh. Kam qenë shumë i kritikuar gjatë gjithë Botërorit, por besoj se gjithçka ishte e shkruar. Falënderoj Zotin që më ka dhënë gjithmonë forcë për të vazhduar. Siç them gjithmonë, Zoti ua jep gjërat atyre që i meritojnë më shumë.”

Në fund, Torres komentoi edhe mënyrën se si u zhvillua finalja, duke theksuar se Argjentina e bëri ndeshjen shumë të vështirë, veçanërisht pas kartonit të kuq.

“Argjentina e ndërtoi ndeshjen në atë mënyrë, sidomos pas përjashtimit me karton të kuq. Unë arrita të ruaja qetësinë dhe kjo ishte shumë e rëndësishme.”

Me golin e tij në shtesë, Ferran Torres u kthye në heroin e finales, duke i dhënë Spanjës fitoren 1-0 ndaj Argjentinës dhe titullin e dytë kampion bote në histori.

---