Partia Socialiste fillon me procedurat për shkarkimin e Presidentit Meta

Kryetari i Grupit Parlamentar të Partisë Socialiste, Taulant Balla, njoftoi se ka dorëzuar në Kuvend kërkesën për mocion me debat për vendimin e presidentit, Ilir Meta, për të shfuqizuar 30 qershorin si datë për zgjedhjet lokale.
Në kërkesën e Ballës dërguar Kreut të Kuvendit, Gramoz Ruçit, thuhet se vendimi i Metës është “një akt absolutisht i pavlefshëm, i marrë në anashkalim të kompetencave të institucionit të Presidentit dhe në kundërshtim flagrant me parimet kushtetuese dhe demokratike”, përcjell albinfo.ch

Sipas Ballës, vendimi i presidentit synon të pengojë në mënyrë të kundërligjshme realizimin e së drejtës kushtetuese të shtetasve shqiptarë për të zgjedhur përfaqësuesit e tyre.

Partia Socialiste pritet të votojë këtë të enjte në Parlament rezolutën për shkarkimin e Ilir Metës nga posti i Presidentit.