Budapest: “Daily News Hungary” vlerëson ekspozitën personale të Jakup Ferrit

Ekspozita “RUB-A-DUB-DUB”, prezantimi i parë i gjerë solo i artistit kosovar në Hungari, do të qëndrojë e hapur deri më 30 maj 2026.

Mediumi hungarez “Daily News Hungary” i ka kushtuar një artikull ekspozitës personale të artistit kosovar Jakup Ferri në Budapest, me titullin “RUB-A-DUB-DUB”, e cila do të qëndrojë e hapur deri më 30 maj 2026. Kjo ekspozitë përfaqëson prezantimin e parë të gjerë solo të Ferrit në Hungari dhe sjell një përzgjedhje të punimeve të tij më të fundit, duke përfshirë tekstile të pa ekspozuara më parë, punime nga seria e gjatë “We We”, si dhe piktura me vaj, përcjell albinfo.ch.

Sipas shkrimit të “Daily News Hungary”, veprat e Ferrit dallohen për ngjyrat e gjalla dhe figurat e njerëzve, kafshëve dhe krijesave hibride, të vendosura në skena që shpesh duken absurde, por që përcjellin butësi dhe ngrohtësi. Shumë nga punimet krijojnë një përvojë imersive për vizitorët, duke i ftuar ata të lidhen me përditshmërinë, marrëdhëniet njerëzore dhe imagjinatën. Artikulli vë në pah edhe një dimension të fshehtë politik në veprat e tij, të ndikuar nga historia komplekse e Kosovës dhe pozicioni i saj periferik kulturor, i trajtuar përmes humorit dhe tregimeve të jetës së përditshme.

Gjatë hapjes së ekspozitës, e zhvilluar më 1 dhe 2 prill 2026, ambasadori i Kosovës në Hungari, Delfin Pllana, theksoi natyrën bashkëpunuese të punimeve tekstile të Ferrit. Ai deklaroi se këto vepra nuk janë vetëm një formë shprehjeje artistike, por edhe një proces bashkëpunimi me artizanë nga Kosova dhe rajoni, ku teknikat tradicionale shndërrohen në tregime bashkëkohore, ndërsa tapetet dhe modelet e qepura bartin kujtime, identitet dhe përvoja të përbashkëta.

Pllana theksoi gjithashtu se skenat e ekspozitës, të mbushura me njerëz, kafshë dhe krijesa imagjinare, sjellin histori të buta dhe surrealiste për jetën e përditshme dhe vlerat e saj, duke nënvizuar rëndësinë e shkëmbimeve kulturore si urë lidhëse mes Kosovës dhe Hungarisë.

Ekspozita “RUB-A-DUB-DUB” sjell një kombinim unik të artit tekstil dhe pikturës, duke ftuar publikun të eksplorojë imagjinatën, kujdesin për detajin dhe historitë që lidhen me identitetin dhe kulturën kosovare./Albinfo.ch

---