Nuk dihet sa shqiptarë jetojnë në diasporë

Ministria e Diasporës nuk ka ndonjë numër të saktë të shqiptarëve që jetojnë në diasporë

Ministria e Diasporës është në fazën përfundimtare të kompletimit të stafit dhe hartimit të projekteve konkrete për mërgimtarët, për të cilët gjatë këtyre ditëve ka pasur aktivitete të ndryshme.

Megjithatë kjo ministri nuk ka ndonjë numër të saktë të shqiptarëve që jetojnë në diasporë.

Zyrtarët e Ministrisë së Diasporës, kanë thënë se gjatë muajve të parë të themelimit të kësaj ministrie, përveç që janë fokusuar në konsolidimin administrativ, kanë qenë duke hartuar projekte konkrete dhe kanë vënë kontakte të vazhdueshme me qendrat e ndryshme të bashkatdhetarëve, duke identifikuar problemet parësore me të cilat përballën mërgimtarët tanë.

Ministria e Diasporës gjatë këtyre muajve është angazhuar që brenda kapaciteteve ekzistuese dhe në bashkëpunim me institucionet relevante, t’iu ofrojë shërbime të ndryshme mërgimtarëve, megjithatë mërgimtaret ende ballafaqohen me probleme të ndryshme.

Ministri Ibrahim Makolli është duke zhvilluar kontakte direkte me institucionet shtetërore të vendeve ku jetojë mërgimtaret dhe tashmë janë të interesuar t’i përkrahin në integrimin sa më të lehtë në vendet ku ata janë duke jetuar përkohësisht.