Në Zvicër, 50 mijë dërgesa ilegale medikamentesh brenda vitit

Medikamentet e tilla janë të pakontrolluara, mund të rrezikojnë shëndetin dhe mund tu kushtojnë porositësve me ndjekje penale

Rreth 50 mijë dërgesa medikamentesh të ndryshme ilegale importohen brenda një viti në Zvicër, kryesisht përmes rrugëve postare. Këtë konstatim e ka bërë sot organizata Swissmedic, sipas së cilës, rreth 1900 dërgesa të dyshimta janë ndalur dhe sekuestruar nga shërbimet doganore brenda një viti.

Sipas saj, në shumicën e rasteve këto medikamente vijnë nga India (45%), të porositura përmes internetit. Po ashtu medikamente ilegale importohen edhe nga vende tjera si Gjermania, Britania e Madhe si dhe nga vende të Lindjes së largët, shkruan nzz.online. Bëhet fjalë kryesisht për barna për erekcion, për dobësim dhe për formim të muskujve.

Swissmedic me këtë rast u tërheq vërejtjen porositësve të medikamenteve ilegale që të kenë kujdes sepse, përveç që janë të pakontrolluara dhe mund të rrezikojnë shëndetin, importimi i tyre mund tu kushtojë porositësve edhe me ndjekje penale.