Ministri Berset shkakton aksion të policisë ajrore gjatë një fluturimi privat

Dyshohet se Berset me avionin që e ngiste, kishte depërtuar në hapësirën e bllokuar ajrore. Kështu, dy avionë luftarakë e kanë shoqëruar atë gjatë aterrimit

Më 5 korrik 2022, ministri federal Alain Berset kishte ndërmarrë një fluturim privat me avion sportiv, midis dy aeroporteve sportive franceze, transmeton albinfo.ch.

Sipas një deklarate nga Departamenti Federal i Punëve të Brendshme (EDI), ai ishte i vetëm në bord.

Në këtë fluturim, “keqinterpretimi” i informacionit nga kontrolli i trafikut ajror çoi në një ndërhyrje të policisë ajrore, njofton EDI.

Pas një kontrolli të identitetit në terren dhe një shkëmbimi faktesh, Alain Berset ishte në gjendje të rifillonte fluturimin e tij në avionin që kishte marrë me qira, shkruan srf.ch. Duke ju përgjigjur pyetjeve të ndryshme të mediave, EDI deklaron se nuk është në dijeni të hapjes së procedimeve ligjore lidhur me rastin.

Sipas “Neue Zürcher Zeitung” të martën, dyshohet se ministri i Brendshëm Berset me avionin që e ngiste, kishte depërtuar  në hapësirën e bllokuar ajrore. Kështu, dy avionë luftarakë e kanë shoqëruar atë gjatë aterrimit, transmeton albinfo.ch. Vetëm hulumtimi i gazetës bëri që Departamenti i Brendshëm të publikonte një deklaratë rreth kësaj.

Sipas EDI, Alain Berset ka marrë patentën e pilotit në vitin 2009 dhe herë pas here merr me qira një avion sportiv me një motor.

---