Mediat greke reagojnë ndaj shqiponjës dykrenore

Sipas autoriteteve greke konsiderohet jo vetëm skandaloze, por edhe një gjest i rrezikshëm për sigurinë kombëtare të Greqisë, njofton albinfo.ch.

Shtatë ushtarë shqiptarë të Ushtrisë greke me shqiponjën e tyre i kanë ‘çmendur’ mediat në Greqi. Ata me duar kishin bërë shqiponjën, derisa fotografia ka bërë bujë në Greqi, duke u komentuar shumë ashpër, raporton albinfo.ch.

Ngjarja ka shqetësuar së tepërmi krerët e ushtrisë greke, te cilët kanë urdhëruar menjëherë hapjen e një hetimi, ndërsa komandanti i repartit dhe shefi i shtabit te forcave tokësore greke, rrezikojnë postet e tyre.

Sipas autoriteteve greke konsiderohet jo vetëm skandaloze, por edhe një gjest i rrezikshëm për sigurinë kombëtare të Greqisë.

U deshën pak orë, që autoritetet helene të kenë emrat e shtatë shqiptarëve me shtetësi greke të përfshirë në këtë incident. Ata janë ndaluar dhe u morën në pyetje prej autoriteteve ushtarake greke.

Sipas një njoftimi të shtabit te përgjithshëm të ushtrisë, hetimet janë hapur për mënyrën e futjes se telefonit brenda ambienteve te repartit, si dhe për shkallën e përfshirjes së 7 kadetëve në propagandë anti-greke.

Mësohet se shtatë kadetët do të bënin betimin e tyre në datën 2 shkurt dhe do të shërbenin në ushtrinë greke për 9 muajt e ardhshëm. Ata kanë marrë shtetësinë greke në saj të ligjit që ua mundëson këtë për shkak të përfundimit të studimeve në shkollat greke.

Dënimet ndaj shtatë ushtareve do të jenë edhe më të forta, edhe për të parandaluar çdo tentativë të imitimit në të ardhmen të gjesteve të ngjashme.