Më shumë refugjatë në shtetet e industrializuara

Më së shumti refugjatë ka nga Afganistani me 15`300 sish. Shtetasit e Serbisë dhe të Kosovës zënë vendin e tretë, me gjithsej 10`300 veta

Është rritur numri i kërkuesve të azilit në vendet e industrializuara, ka bërë të ditur UNHCR të martën në Gjenevë.

198`300 veta kanë këkuar azil nga janari deri në shtator të vitit 2011, ose 17% më shumë se gjatë periudhës së njëjtë të vitit të kaluar.

Në radhë të parë ka shënuar shtim numri i azilkërkuesve nga Tunizia (4600), nga Bregu i Fildishtë (3300) dhe nga Libia (2000).

Por, në numrat absolutë, listës së shteteve me më shumë azilkërkues i prinë Afganistani me 15`300 sish. Në vendin e dytë janë shtetasit e Kinës (11`700) dhe menjëherë pas tyre vijnë shtetasit e Serbisë dhe të Kosovës (të paspecifikuar), të cilët sipas UNHCR-së janë gjithsej 10`300 veta. Në vazhdim të listës janë irakienët, iranianët etj.

Megjithëkëtë, shumica e madhe e atyre që ikin nga vendet e tyre, strehohen në vendet fqinje dhe jo në vendet industriale. Në muajin qershor UNHCR ne një raport pati konstatuar se katër nga pesë refugjatët (ose 80%) jetojnë në vendet në zhvillim.