Luan Bajraktari, në ekspozitën “Parallel Viena” në Austri

Luani ka zgjedhur që në këtë ekspozitë me rëndësi të paraqitet me një instalacion interesant

Artisti kosovar, Luan Bajraktari do të marrë pjesë në ekspozitën “Parallel  Viena 2015” që do të mbahet javën e ardhshme në Vjenë të Austrisë.

Në këtë ekspozitë e cila do të jetë e hapur për vizitorët nga 22 deri me 27 shtator, artistë nga vende të ndryshme të botës do të prezantohen me punimet e tyre, ndërsa Luan Bajraktari ka zgjedhur që të paraqitet me një instalacion.

“Unë do të prezantohem me një punim timin që do të jetë një instalacion dhe besoj se do të jetë interesante edhe për vizitorët”, shprehet për albinfo.ch, Luan Bajraktari.

Për artistin nga Klina kjo nuk është hera e parë që ai prezantohet para publikut vjenez.

“Në Vjenë kam pasur edhe  ekspozita tjera, ndërsa pjesëmarrja në një ekspozitë si kjo e tashmja është e para për mua”, thotë Luani. Ai më tutje thekson se ka marrë pjesë në ekspozita në vende të shumta, ndër to edhe në Itali ku Luani specializoi dhe jetoi për disa vite para se të kalonte në Austri.

Rreth përmbajtjes së punimit të tij artistik, ai nuk ka dëshirë të zbulojë më shumë.

“Detyra e një artisti është që punimin ta paraqesë para publikut, i cili pastaj mund ta zbërthejë përmbajtjen. Jo vetëm unë por secili artist në punimet e tij e paraqet botën e tij, të kaluarën apo atë çfarë e preokupon rrethin dhe vendin e tij”, nënvizoi Bajraktari.

Luan Bajrakatari menjëherë pas kësaj ekspozite, më datën 27 shtator do të marrë pjesë në një tjetër ekspozitë në Shqipëri për të vazhduar më pas në muajin tetor me një tjetër paraqitje. Kësaj radhe në Armeni.