Kamionët mbi 3.5 tonësh duhet të aplikojnë për licencë

Nga një janari i vitit 2016 në Zvicër do të vlejë detyrimi për licencë për të gjitha automjetet që bartin mallra me peshe të gjithëmbarshme më shumë se 3.5 tonelata. Deri tash në Zvicër ka vlejtur detyrimi për licencë vetëm për makinat me tonazh nga 6 tonë e më lart.

Kështu, ndërmarrjet të cilat në parkun e tyre të automjeteve kanë makina me tonazh në mes 3.5 dhe 6 tonë, do t`u jepet mundësia që për licencën e re të aplikojnë brenda dy viteve të ardhshme.

Pas rishikimit që Asambleja Parlamentare e Zvicrës i kishte bërë në vitin 2014 ligjit federal mbi dhënien e lejeve ndërmarrjeve të transportit rrugor, shtrohej nevoja e përshtatjes me rregullat përkatëse të vlefshme në BE. Me vënien në jetë të legjislacionit të njëjtë me atë të shteteve të BE-së, Zvicra përforcon integrimin e saj në tregun evropian të trafikut rrugor, thuhet në një komunikatë të Zyrës Federale për Transport Rrugor.