Ka vdekur Emilie Lieberherr, qeveritarja e parë në historinë e Cyrihut

Në vitet 1978-1983 Lieberherr ishte deputete në dhomën e ulët të Parlamentit Federal të Zvicrës

Ka ndërruar jetë në moshën 86 vjeçare Emilie Lieberherr, e njohur si gruaja e parë në historinë e Cyrihut që ishte bërë pjesë e qeverisë së qytetit në vitin 1970. Në këtë qeveri, si përfaqësuese e Partisë Socialdemokrate, ajo ka mbajtur deri në vitin 1994 resorin e punëve sociale.

Veç kësaj, në vitet 1978-1983 Lieberherr ishte edhe deputete në dhomën e ulët të Parlamentit Federal të Zvicrës.

Ajo, gjatë karrierës së saj politike është dalluar si luftëtare e vendosur për jetësimin e synimeve të veta dhe për këtë arsye ka rënë në konflikt me partinë e saj, e cila, në vitin 1990 e kishte përjashtuar nga radhët e veta për “mungesë solidariteti partiak”.

Lieberherr është angazhuar për të drejtat e gruas dhe ka qenë shumë aktive në mbrojtjen e konsumatorëve. Ndërkaq, iajo njihet edhe si autore e idesë për dhënien e kontrolluar të heroinës personave me varësi.