Iniciativë kundër ndalimit të minareve

Iniciuesit thonë se e vetmja mundësi brenda rregullave të shtetit juridik është iniciativa e re popullore

Saktësisht një vit pas pranimit me referendum të iniciativës për ndalimin e minareve, Këshilli Qendror Islamik i Zvicrës (IZSR) ka nisur një iniciativë të re, të drejtuar kundër ndalimit në fjalë. Siç shkruan gazeta Tages Anzeiger, iniciuesit thonë se e vetmja mundësi për të realizuar këtë të drejtë brenda rregullave të shtetit juridik është iniciativa e re popullore.

Sipas njërit nga përfaqësuesit e Këshillit në fjalë, ndalimi i minareve synon në mënyrë të padyshimtë reduktimin e numrit dhe rolit të myslimanëve në Zvicër. Një komitet për këtë iniciativë do të ngritet deri në fund të këtij viti.

Siç dihet tashmë, populli në referendumin e mbajtur para një viti, me 57 për qind të votave të tij pati kërkuar ndalimin e ndërtimit të minareve në Zvicër. Në tetorin e këtij viti, ndërkaq, dhoma e kantoneve e Parlamentit Federal ka kundërshtuar të debatojë lidhur me ndalimin e ndërtimit të minareve.