Covid-19 shtoi depresionin te njerëzit

Në më pak se një muaj, një djalë 29-vjeçar dhe një zotëri 65 vjeç i dhanë fund jetës, duke u hedhur nga ndërtesa e Sanatoriumit, Spitali Covid 2, ku ishin shtruar për shkak se ishin infektuar.

Ne ndodhemi tek Urdhri i Psikologut të Republikës së Shqipërisë për të pyetur se çfarë ndodh me shëndetin mendor të pacientëve me Covid dhe familjarëve të tyre.

“Është provuar edhe shkencërisht, që Covid-i prek edhe sistemi nervor. Pasojat janë halucinacione, pagjumësi, luhatje humori, atake paniku dhe çrregullim të ankthit. Gati 1000 psikologët e urdhrit tonë ofrojnë shërbim online falas për ata që kurohen në shtëpi”, shprehet Valbona Treska, presidente e UPSH-së.

Më tej, Treska sqaron:

“Por, ne nuk lejohemi të ofrojmë këshillim psikologjik te pacientët që janë të shtruar, pasi nuk lejohen telefonat. Ndërkohë është emergjente prania e psikologëve nëpër spitale. Po ashtu rekomandojmë që pacientët e shtruar, të mund të flasin me familjarët e tyre, njerëzit më të dashur, pasi është një terapi shumë e mirë. Për këtë arsye UPSH-ja iu drejtua sot me një email Shoqatës Botërore të Psikologëve për të ditur praktikat me të cilat operojnë homologët tanë”.