Në një deklaratë, komandanti i KFOR-it, Ozkan Ulutash, është shprehur se situata e sigurisë në Kosovë që nga tetori i vitit 2025 është përgjithësisht e qetë, megjithëse mbetet e brishtë dhe me potencial për tensione të reja, veçanërisht në veri të vendit, përcjell albinfo.ch.

Gjatë informimit të ambasadorëve të aleatëve dhe partnerëve të NATO-s në Bruksel të mërkurën, Ulutash theksoi se NATO-ja vazhdon të mbështesë përpjekjet e përditshme të KFOR-it për ruajtjen e një mjedisi të sigurt dhe të qetë për të gjitha komunitetet në Kosovë, si dhe për garantimin e lirisë së lëvizjes.

Ulutash deklaroi se nuk është vërejtur rifshfaqje e dhunës në veri, ashtu siç ndodhi në vitin 2023.

“Që nga tetori 2025, kemi vërejtur se situata është përgjithësisht e qetë. Megjithatë, situata mbetet e brishtë, me potencial për tensione të reja, veçanërisht në veri”, theksoi ai, duke shtuar se prioritet kryesor mbetet ruajtja e stabilitetit për të gjitha komunitetet.

Ulutash nënvizoi se KFOR-i mban një prani të dukshme, të shkathët dhe fleksibile në terren, për të reaguar ndaj çdo zhvillimi që mund të ndikojë në sigurinë në Kosovë dhe stabilitetin rajonal, si dhe për të ulur tensionet në rast të shenjave për përshkallëzim.

Ai shprehu mirënjohje për aleatët dhe partnerët e NATO-s për mbështetjen e vazhdueshme, duke theksuar se KFOR-i mbetet i përkushtuar në zbatimin e mandatit në mënyrë të plotë dhe të paanshme.

Në të njëjtën kohë, komandanti i KFOR-it bëri të ditur se misioni vazhdon të mbajë kontakte të ngushta me të gjithë akterët relevantë, ndërsa mbështet dialogun e lehtësuar nga Bashkimi Evropian për normalizimin e marrëdhënieve ndërmjet Beogradit dhe Prishtinës si rrugëzgjidhja e vetme.

Kosova ka shënuar përparim në lirinë e medias, sipas Indeksit Botëror të Lirisë së Shtypit të organizatës “Reporterët pa Kufij”, duke u renditur në vendin e 84-të, apo 15 pozita më lart krahasuar me vitin paraprak, përcjell albinfo.ch.

“Me përjashtim të Kosovës, që shënoi përparim pavarësisht se mbetet një nga shtetet me renditjen më të ulët në Evropë, liria e shtypit në Ballkanin Perëndimor në përgjithësi po përkeqësohet”, thuhet në raportin e Reporterëve pa Kufij.

Vitin e kaluar, Kosova kishte shënuar regresin më të madh në këtë indeks, duke rënë në vendin e 99-të nga 180 shtete, çka u konsiderua rënia më e madhe në 15 vjet në raportin vjetor të lirisë së shtypit.

Në pjesën e raportit që i dedikohet Kosovës, Reporterët pa Kufij kanë përmendur edhe çështjen e Komisionit të Pavarur për Media (KPM), duke theksuar se rregullatori i mediave ishte subjekt i një reforme legjislative që më pas u shpall jokushtetuese nga Gjykata Kushtetuese.

“Rregullatori joefektiv i mediave, Komisioni i Pavarur për Media [KPM], ishte subjekt i një reforme legjislative, e cila u shpall jokushtetuese nga Gjykata Kushtetuese”, thuhet në raport.

Organizata vlerëson se, edhe pse mediat në Kosovë kanë arritur të mbajnë përgjegjës politikanët, gazetarët vazhdojnë të jenë subjekt i sulmeve politike.

Gjendja e lirisë së medias në Ballkanin Perëndimor

Pavarësisht përparimit të shënuar, Kosova vazhdon të mos renditet më së miri në rajon sa i përket lirisë së shtypit.

Sipas indeksit të këtij viti, Mali i Zi renditet në vendin e 41-të, Maqedonia e Veriut në vendin e 45-të, ndërsa Shqipëria është një pozitë më lart se Kosova, në vendin e 83-të.

Bosnjë dhe Hercegovina renditet në vendin e 90-të, ndërsa Serbia renditet më së keqi në rajon, në vendin e 104-të.

“Edhe pse Shqipëria, Bosnjë e Hercegovina dhe Serbia aspirojnë të bëhen pjesë e Bashkimit Evropian, që të tri shtetet janë armiqësore ndaj gazetarisë dhe të cenueshme ndaj propagandës”, thuhet në raport.

Sipas Reporterëve pa Kufij, rajoni i Evropës Lindore dhe Azisë Qendrore vazhdon të jetë në vendin e parafundit në indeksin e këtij viti, ndërsa zona e Bashkimit Evropian dhe Ballkanit renditet e para, pavarësisht rënies së kushteve në gazetari.

Organizata thekson se ky rajon po i ngjan gjithnjë e më shumë një “eksperimenti të gjerë”, ku vlerat përmbysen dhe legjislacioni përdoret për t’u shërbyer atyre që janë në pushtet, në dëm të së drejtës për informim, raporton REL.

Në indeksin e këtij viti, vendi i parë për lirinë e shtypit i takon Norvegjisë, ndërsa vendi i fundit, i 180-ti, Eritresë./Albinfo.ch

Analisti Eugen Cakolli ka sqaruar procedurat kushtetuese që pasojnë shpërndarjen e Kuvendit të Kosovës, duke theksuar se vendi tashmë hyn në një periudhë të kufizuar funksionimi institucional deri në mbajtjen e zgjedhjeve të reja, përcjell albinfo.ch.

Sipas tij, tani që Kuvendi konsiderohet i shpërndarë me efekt kushtetues, ushtruesja e detyrës së presidentes ka afat prej 10 ditësh për të caktuar datën e zgjedhjeve, pas konsultimeve me partitë politike dhe Komisionin Qendror të Zgjedhjeve, transmeton Zeri.info.

Cakolli thekson se zgjedhjet e parakohshme duhet të mbahen brenda 45 ditëve nga shpërndarja e Kuvendit, por jo më herët se 30 ditë. Ai sqaron se, ndonëse data e zgjedhjeve duhet të shpallet brenda 10 ditëve, kjo nuk e ndryshon afatin maksimal për mbajtjen e tyre.

Sipas tij, kufiri i fundit për organizimin e zgjedhjeve bie më 31 maj ose 7 qershor.

Ndërkohë, Cakolli ka renditur edhe pasojat kryesore institucionale që sjell shpërndarja e Kuvendit.

Ai thekson se me shpërndarjen e Kuvendit përfundon edhe mandati i Qeverisë. Sipas tij, nga mesnata e mbrëmshme, Qeveria konsiderohet në dorëheqje dhe veprimtaria e saj kufizohet vetëm në punë të domosdoshme dhe të planifikuara sipas buxhetit dhe planit vjetor.

Në këtë periudhë, Qeveria nuk mund të propozojë projektligje të reja, strategji apo dokumente politike, si dhe nuk mund të bëjë emërime apo marrëveshje ndërkombëtare që kërkojnë ratifikim.

Po ashtu, ai thekson se rreth 30 projektligje që kanë qenë në procedurë parlamentare rikthehen në pikën zero, pasi procesi legjislativ duhet të nisë nga fillimi pas konstituimit të Kuvendit dhe formimit të qeverisë së re.

Një tjetër pasojë, sipas Cakollit, është edhe fakti se raportet e institucioneve të pavarura mbesin pa shqyrtim, duke pezulluar procesin e llogaridhënies deri në krijimin e legjislaturës së re.

Në përfundim, Cakolli vlerëson se deri në mbajtjen e zgjedhjeve dhe formimin e institucioneve të reja – proces që mund të zgjasë të paktën tre deri në katër muaj – Kosova do të funksionojë në një lloj “pauze” institucionale./Albinfo.ch

Kosova pritet të shkojë në zgjedhje të parakohshme parlamentare, pasi procesi për zgjedhjen e presidentit ka dështuar të përmbyllet brenda afateve kushtetuese, duke e thelluar krizën politike dhe institucionale në vend, përcjell albinfo.ch.

Pas disa tentimeve në Kuvend dhe mungesës së konsensusit politik mes pozitës dhe opozitës, partitë politike nuk arritën të sigurojnë kuorumin dhe marrëveshjen e nevojshme për zgjedhjen e kreut të shtetit.

Dështimi për zgjedhjen e presidentit e ka futur vendin në një situatë të re politike, ku zgjedhjet e jashtëzakonshme konsiderohen si epilogu i vetëm institucional për dalje nga ngërçi.

Gjatë ditës, përfaqësues të partive politike shkëmbyen akuza reciproke për përgjegjësinë e këtij dështimi. Pushteti fajësoi opozitën për mungesë bashkëpunimi dhe bojkot të seancave, ndërsa partitë opozitare akuzuan qeverinë për keqmenaxhim të procesit dhe tentativa për ta përdorur krizën për kalkulime elektorale.

Moszgjedhja e presidentit brenda afatit kushtetues hap rrugën për shpërndarjen e Kuvendit dhe organizimin e zgjedhjeve të reja parlamentare, duke e futur Kosovën në një tjetër cikël zgjedhor.

Zgjedhjet e parakohshme pritet të jenë një test i ri politik për partitë kryesore, në një kohë kur vendi përballet me pasiguri institucionale dhe polarizim të thelluar politik, ndërsa data e saktë e mbajtjes së tyre pritet të bëhet e ditur në ditët ose javët në vijim nga institucionet përkatëse./Albinfo.ch

Pas shpërndarjes së Kuvendit të Kosovës, ka reaguar ekipi i ish-Presidentes Vjosa Osmani, përcjell albinfo.ch.

Këshilltarja e saj, Egnesa Vitija, ka publikuar në rrjete sociale një fotografi të Osmanit, duke e shoqëruar me mbishkrimin e shkurtër: “Shihemi”.

Ky reagim vjen në një kohë të zhvillimeve të reja politike, ku vendi pritet të shkojë drejt zgjedhjeve të reja.

Ndërkohë, në fjalimin e mbajtur mbrëmë, Kryeministri i Kosovës Albin Kurti ka kritikuar ish-Presidenten Osmani, duke deklaruar se ajo kishte tentuar shpërndarjen e Kuvendit përmes një dekreti që ai e cilësoi si jokushtetues.

Deklaratat dhe reagimet e fundit tregojnë për rritjen e tensioneve politike, ndërsa pritet që në ditët në vijim të ketë zhvillime të tjera lidhur me procesin zgjedhor dhe pozicionimet e partive politike./Albinfo.ch 

Kryetari i Lidhjes Demokratike të Kosovës (LDK), Lumir Abdixhiku, ka reaguar pas shpërndarjes së Kuvendit të Kosovës, duke deklaruar se vendi po shkon në zgjedhje të reja për shkak të, siç tha ai, qasjes së pushtetit që me 51 për qind të votave kërkoi nënshtrim, përcjell albinfo.ch. 

Abdixhiku ka thënë se LDK kishte propozuar emrin e ish-Presidentes Vjosa Osmani dhe kishte siguruar 15 nënshkrime për kandidaturën e saj, por sipas tij ky propozim u injorua.

“Kërkuan nënshkrime. Ua dhamë, 15 sosh, sa i kishim. Në fund, kërkuan gjënë e vetme që dinin, nënshtrimin. Këtë s’mund ta kishin”, ka shkruar Abdixhiku.

Ai ka shtuar se pushteti e kishte parë Vjosa Osmanin vetëm si kuorum, duke e konsideruar atë si numër plotësues për kandidaten e tyre.

“Vjosën, Presidenten e deritashme, e panë vetëm si kuorum, si numër plotësues për Presidenten e tyre ‘karate’. Ne e pamë ndryshe. E pamë siç duhet të ishte edhe me votat e tyre, një Presidente përfaqësuese dinjitoze e Republikës”, ka deklaruar ai.

Sipas Abdixhikut, dallimi mes opozitës dhe pushtetit do të vuloset nga qytetarët në zgjedhjet e ardhshme.

“Do ta vulosë populli i Kosovës. Do ta zgjedhë vet. Tani është koha për bashkimin e njerëzve të mirë të këtij vendi, që duan një Kosovë normale, pa dramë, pa propagandë, me dinjitet brenda Lidhjes Demokratike. Do ta kemi!”, ka përfunduar Abdixhiku.

Në një deklaratë publike, Abdixhiku u shpreh se nuk ka ndodhur asnjëherë që një parti politike, e cila ka fituar 51% të mbështetjes, të mos arrijë të zgjedhë presidentin, pavarësisht se ka një kandidat dhe mbështetje të deklaruar.

“Nuk ka ndodhur asnjëherë në historinë e Kosovës që një parti me 51% të mos arrijë të zgjedhë presidentin duke pasur kandidat e mbështetje’’, tha ai./Albinfo.ch 

Në Kuvendin e Kosovës, dje ka përfunduar afati i fundit kushtetues për zgjedhjen e Presidentit të vendit. Deri në orët e fundit të këtij afati, Lëvizja Vetëvendosje tentoi të sigurojë zgjedhjen e Presidentes përmes kandidates Feride Rushiti, por procesi dështoi për shkak të mungesës së mbështetjes nga partitë opozitare, përcjell albinfo.ch. 

Sipas zhvillimeve në sallë, opozita nuk e mbështeti kandidaturën e propozuar dhe, në disa tentativa radhazi, nuk qëndroi në sallën e Kuvendit, duke pamundësuar vazhdimin e procedurave dhe votimin.

Ndërkohë, Lidhja Demokratike e Kosovës (LDK) propozoi Vjosa Osmanin për Presidente, duke siguruar edhe 15 nënshkrime për kandidaturën e saj. Megjithatë, ky propozim nuk u mor parasysh dhe nuk u fut në procedurë për shqyrtim.

Pas dështimit të zgjedhjes së Presidentit brenda afatit ligjor, zyrtarisht Kosova tashmë pritet të shkojë drejt zgjedhjeve të reja parlamentare, të cilat sipas pritjeve do të mbahen pas disa muajsh.

Ky zhvillim e fut vendin në një fazë të re politike, ndërsa pritet që institucionet përkatëse të caktojnë datën dhe procedurat për mbajtjen e zgjedhjeve./Albinfo.ch