Guy Parmelin viziton sot Maqedoninë e Veriut, vizita e parë presidenciale zvicerane në histori

Presidenti i Konfederatës së Zvicrës pritet në Shkup nga presidentja Gordana Siljanovska-Davkova dhe do të shoqërohet nga një delegacion i nivelit të lartë ekonomik.

Presidenti i Konfederatës së Zvicrës, Guy Parmelin, po zhvillon sot, më 29 prill, vizitën e parë presidenciale zvicerane në Maqedoninë e Veriut, një ngjarje që sipas autoriteteve zvicerane nënvizon lidhjet gjithnjë e më të ngushta ndërmjet dy vendeve, transmeton albinfo.ch. 

Sipas njoftimit zyrtar nga Berna, Parmelin do të pritet në Shkup nga presidentja Gordana Siljanovska-Davkova, ndërsa gjatë ditës do të zhvillojë takime edhe me kryeministrin Hristijan Mickoski dhe anëtarë të qeverisë.

Në agjendën e vizitës është paraparë edhe një takim me kryetarin e Kuvendit të Maqedonisë së Veriut, Afrim Gashi.

Presidenti zviceran po shoqërohet në këtë vizitë nga një delegacion ekonomik i nivelit të lartë, me fokus në forcimin e bashkëpunimit dhe rritjen e shkëmbimeve ekonomike mes dy vendeve, veçanërisht në fushat e digjitalizimit dhe teknologjisë.

Në kuadër të programit në Shkup do të organizohet edhe një pritje zyrtare për shënimin e themelimit të Dhomës Zvicerane të Tregtisë në Maqedoninë e Veriut.

Autoritetet zvicerane kanë theksuar se marrëdhëniet bilaterale janë shumë të mira, duke veçuar edhe diasporën e madhe nga Maqedonia e Veriut në Zvicër, e cila numëron mbi 100 mijë persona./Albinfo.ch 

---