Presidenca ka pranuar letrën nga Kuvendi i Kosovës në lidhje me seancën konstituive, e cila u ndërpre të martën, përcjell albinfo.ch.

Këtë e kanë konfirmuar nga Presidenca, ku kanë thënë se ekipi ligjor është duke e analizuar letrën për t’i propozuar hapat e mëtejmë Presidentes.

“Letra sapo ka ardhur në Presidencë dhe ekipi ligjor i Presidencës është duke e analizuar, për t’i propozuar Presidentes hapat e mëtejmë”, ka konfirmuar Bekim Kupina, këshilltar për media.

Republika e Kosovës është përfshirë në listën e Bashkimit Evropian prej shtatë vendesh që konsiderohen “të sigurta”, në përpjekje për të përshpejtuar kthimin e migrantëve, dhe duke e bërë më të vështirë për qytetarët e atyre vendeve të kërkojnë azil në bllok, raporton AFP, përcjell albinfo.ch.

Komisioni Evropian tha se po propozon që Kosova, Bangladeshi, Kolumbia, Egjipti, India, Maroku dhe Tunizia të shpallen si “vende të sigurta të origjinës”.

“Shumë shtete anëtare po përballen me një numër të madh aplikimesh të papërpunuara për azil, ndaj gjithçka që mund të bëjmë tani për të mbështetur marrjen më të shpejtë të vendimeve për azil është thelbësore”, tha Magnus Brunner, komisioneri i BE-së për migracionin, teksa e paraqiti listën e shteteve.

Tani i takon Parlamentit Evropian dhe Këshillit të bien dakord për këtë propozim.

Azilkërkuesit që shkojnë në BE nga këto shtatë vende mund të përballen me refuzimin e kërkesave të tyre dhe potencialisht me një urdhër kthimi, sipas rregullave të reja të BE-së.

Numri i azilkërkuesve nga Kosova në BE është rritur pas liberalizimit të vizave më 1 janar 2024.

Më shumë kërkesa për azil ka pasur vetëm në vitet 2015/2016 kur dhjetëra mijëra kosovarë kanë emigruar drejt BE-së përmes rrugëve ilegale të Hungarisë.

Franca ka qenë destinacion kryesor i kosovarëve që kërkojnë azil në BE qysh nga viti 2018, kur për herë të parë zuri vendin e Gjermanisë si destinacion kryesor.

Brukseli ka qenë nën presion që të frenojë migrimin e paligjshëm dhe të lehtësojë procesin e dëbimit, teksa përkeqësimi i opinionit publik sa i përket migracionit ka nxitur rritjen e të djathtës ekstreme në disa shtete.

Të udhëhequr nga shtete me qëndrim të ashpër si Suedia, Italia, Danimarka dhe Holanda, udhëheqësit e BE-së në tetor kërkuan hartimin e një legjislacioni të ri me qëllim që të rriten dhe përshpejtohen dëbimet e migrantëve, por edhe kërkuan nga Komisioni që të vlerësojë mënyra “inovative” për të luftuar migracionin e paligjshëm.

Si përgjigje ndaj këtyre kërkesave, muajin e kaluar Komisioni prezantoi një reformë të në sistemin e dëbimeve, reformë që i hapi rrugën që shtetet anëtare të krijojnë qendra për kthimin e migrantëve jashtë BE-së.

Aktualisht, më pak se 20 për qind e personave që janë urdhëruar që të largohen nga blloku janë kthyer në vendet e tyre të origjinën, thuhet në të dhënat e BE-së.

Policia e Kosovës njoftoi se në pikëkalimin kufitar në Merdar, në dalje të Kosovës, katër shtetasve serbë u janë gjetur 51.170 euro, ku secili prej tyre kishte mbi 10.000 euro, përcjell albinfo.ch.

Sipas njoftimit policor, paratë e padeklaruara janë gjetur në çantat e tyre të dorës.

Çështja është trajtuar nga zyrtarët doganorë, ndërsa personave në fjalë u është shqiptuar kundërvajtje doganore.

“Me datën 15.04.2025, rreth orës 15:30, në pikëkalimin kufitar në Merdar, në dalje të Republikës së Kosovës, gjatë kontrollimit të hollësishëm të katër udhëtarëve këmbësorë, shtetas të Serbisë, në çantat e tyre të dorës janë gjetur në total 51.170 (pesëdhjetë e një mijë e njëqind e shtatëdhjetë) euro të padeklaruara, ku secili nga udhëtarët kishte më shumë se 10.000 euro veç e veç”, thuhet në njoftimin e Policisë në Facebook.

Sot, gjatë mbledhjes së Qeverisë, kryeministri i Kosovës, Albin Kurti, ka thënë se, ndonëse partitë e tjera politike gjatë mandatit të tyre qeverisës në të kaluarën kanë pasur pothuajse të njëjtin fat, Lëvizja Vetëvendosje, sipas tyre, “duhet të largohet nga zyrat e saj një orë e më parë”, përcjell albinfo.ch.

Kurti ka deklaruar se ata që nuk pranuan të marrin formalisht mandatin e deputetit, po kërkojnë nga ai që formalisht të mos jetë kryeministër.

Konstituimi i Kuvendit, i cili dje u pamundësua nga PDK, LDK, AAK dhe Lista Serbe, dështoi pasi këto parti nuk votuan raportin për verifikimin e mandateve të deputetëve. Në thelb, ata nuk pranuan të marrin formalisht mandatin e deputetit, por kërkojnë nga unë që formalisht të mos jem kryeministër, tha Kurti.

“Qeveria jonë dhe ky kabinet qeveritar janë në detyrë, dhe efektivisht të dorëhequr që nga 23 marsi i këtij viti, kur edhe kemi përmbushur mandatin e rregullt dhe të plotë katërvjeçar. Nga ajo ditë e deri në zgjedhjen e Qeverisë së re nga legjislatura e nëntë e Kuvendit të Kosovës, qeveria jonë ushtron të gjitha përgjegjësitë që i takojnë pushtetit ekzekutiv në përputhje me legjislacionin në fuqi. Kemi vendosur që qeveria të jetë në një rol kujdestar, për të garantuar vazhdimësinë, sigurinë dhe funksionimin e pandërprerë të shtetit tonë, në zbatim të Kushtetutës dhe ligjeve”, ka thënë Kurti.

“Në historikun tonë të formimit të institucioneve, kemi shembuj nga e kaluara kur një qeveri e udhëhequr nga PDK – ndonëse me Kuvend të shpërndarë –, një qeveri e udhëhequr nga AAK – ndonëse e dorëhequr –, dhe një qeveri e udhëhequr nga LDK – ndonëse e shpallur si e jashtëligjshme – kanë qëndruar në detyrë deri në formimin e qeverisë së re. Por një qeveri e udhëhequr nga Lëvizja Vetëvendosje – ndonëse ka përmbushur mandatin e saj të rregullt katërvjeçar – duhet të largohet nga zyrat e saj një orë e më parë”, ka shtuar ai.

Në fjalën e tij në mbledhjen e Qeverisë, Kurti tha se Republika e Kosovës po shënon suksese në ekonomi, rend e ligj dhe demokraci, pavarësisht “zhurmës opozitare dhe disa mediave të ish-regjimit dhe oligarkëve”.

“I siguroj qytetarët se, përtej zhurmës opozitare dhe disa mediave të ish-regjimit dhe oligarkëve, që madje kanë shkuar aq larg sa t’i regjistrojnë bizneset në Serbi, Republika e Kosovës, atdheu ynë, po ecën përpara në ekonomi, në demokraci, në rend dhe ligj, në siguri e paqe për të gjithë”, deklaroi Kurti.

26-vjetori i eksodit të shqiptarëve të Kosovës shënohet sot, kur gjatë luftës në vitet 1998–1999 rreth një milion shqiptarë u detyruan nga forcat paramilitare serbe të shpërnguleshin në Shqipëri dhe Maqedoni, përcjell albinfo.ch.

Shumë prej të shpërngulurve u nisën drejt Shqipërisë dhe Maqedonisë, ndërsa mijëra shqiptarë të tjerë kaluan kufirin edhe me Malin e Zi. Qindra mijëra u zhvendosën nga shtëpitë e tyre për të gjetur strehim në malet e Kosovës.

Ata ishin fëmijë, gra dhe të moshuar, të dhunuar, të torturuar dhe të masakruar. Në çdo përvjetor të eksodit të vitit 1999, që mori përmasa biblike, në Kukës bëhet përkujtimi – dhe në dy vitet e fundit, edhe simbolikisht për shkak të pandemisë – i kësaj drame vuajtjesh ndër më të rëndat që kanë përjetuar njerëzit e kësaj toke.

Eksodi, apo dëbimi i shqiptarëve me dhunë nga vatrat e tyre, arriti kulmin pas fillimit të bombardimeve të NATO-s kundër pikave ushtarake dhe policore të ish-Jugosllavisë (Serbisë dhe Malit të Zi).

Më 27 mars, në orën 13:20, në pikëkalimin doganor të Vërmicës/Morinës, kaluan në Kukës 187 refugjatët e parë nga Kosova, ku shumica ishin fëmijë dhe gra, të cilët ndodheshin në gjendje të mjerueshme fizike dhe mendore, si dhe të plagosur me mjete të forta si: qyta pushke, shkopinj gome, etj. U morën masa të menjëhershme për transportimin e tyre me mjete të transportit civil dhe të ushtrisë nga drejtuesit e Prefekturës së Kukësit. Ata ishin kryesisht banorë të fshatrave të Prizrenit, Krushës së Madhe dhe Zymit. Fillimisht, këta refugjatë u strehuan në Pallatin e Kulturës “Hasan Prishtina”.

Deri në orën 24:00 të datës 27.03.1999, në Kukës mbërritën 12,721 kosovarë. Ndihmat e para ushqimore erdhën nga Ministria e Bujqësisë e Shqipërisë, ku më 27 mars në Kukës u dërguan kontingjente me ushqime (vaj, miell, sheqer, makarona, oriz, sapun etj.) për 2,500 persona në muaj.

Më 28 mars, fluksi i kosovarëve drejt Kukësit vazhdoi – të dëbuar me forcë nga pushtuesit serbë. Numri i tyre arriti në 13,000 banorë. Refugjatët hynin në Kukës nga pikëkalimi i Vërmicës/Morinës, ku ishin dhunuar, torturuar, masakruar dhe zhveshur nga policët serbë, duke u marrë paratë, bizhuteritë dhe çdo send me vlerë që kishin.

Vendstrehimi i tyre i përkohshëm ishte Pallati i Kulturës “Hasan Prishtina”. Më pas, pushteti lokal në Kukës hapi dyert e disa mjediseve shkollore, çerdheve, kopshteve, magazinave dhe depozitave për strehimin e të dëbuarve. Refugjatët e tjerë u strehuan në familje kuksiane, të cilat i mikpritën. Mesatarisht, çdo familje në qytetin e Kukësit kishte rreth 14 kosovarë. Ata flinin në çdo pjesë të shtëpisë.

Në krye të javës, në Kukës mbërriti karvani i dytë i të dëbuarve me rreth 70,000 kosovarë. Nga këta, 40,000 u sistemuan pranë familjeve qytetare, 10,000 në mjedise të ndryshme publike të qytetit, 6,000 në komunat Bicaj, Kolsh, Tërthore dhe Shtiqën, 12,000 në qytetin e Krumës dhe 300 në komunën Golaj. Në Kukës mbërritën 16 automjete për të evakuuar një pjesë të kosovarëve në qytete të tjera. Dita-ditës, numri i të dëbuarve rritej. Përveç strehimit në shtëpitë e banorëve kuksianë, një numër i madh kosovarësh u strehuan në kampe.

16 prilli është data kur në Kukës shënohet Dita e Eksodit, si shenjë falënderimi dhe respekti për të gjithë ata që hapën dyert për të pritur vëllezërit shqiptarë nga Kosova.

Një nga simbolet kryesore të 16 Prillit është edhe Obelisku. Kulla u ndërtua si shenjë falënderimi ndaj popullit shqiptar. Ajo është ngritur në vendin ku ishin vendosur çadrat që strehonin popullatën kosovare. Kulla është 23.5 metra e lartë dhe është e mbushur me fotografi që paraqesin ngjarjet e asaj kohe. Kulla është një nga pikat më të vizituara turistike në Kukës. Gjatë 16 prillit, ajo është vendi më i frekuentuar për përkujtim.

Për të kujtuar ditët e shpërnguljes me dhunë të shqiptarëve nga shtëpitë e tyre dhe vuajtjet e tyre nga regjimi serb, në Qendrën Përkujtimore “Bllaca ‘99” në Han të Elezit qëndron monumenti “Muri i Kujtesës” si dhe parku “Hasan Prishtina”.

Monumenti “Muri i Kujtesës” është një mozaik që simbolizon sakrificën e nënës shqiptare, bashkë me emrat e disa prej personaliteteve të shquara botërore që kontribuuan në çlirimin e Kosovës – një vepër artistike-monumentale që shpreh më së miri kujtimin dhe respektin për të gjithë ata që sollën lirinë dhe pavarësinë e shumëpritur.

Në mbledhjen e sotme, Zyra e Rregullatorit të Energjisë ka aprovuar shtrenjtimin e rrymës prej 16.1 për qind, përcjell albinfo.ch.

Anëtarët e bordit i dhanë “dritën e gjelbër” këtij shtrenjtimi me pesë vota pro dhe asnjë kundër.

Tarifat e reja do të jenë të vlefshme nga data 1 maj 2025 deri më 31 mars 2026.

Ato do të aplikohen për konsumatorët shtëpiakë dhe bizneset.

Tarifa e ditës, për ata që shpenzojnë më pak se blloktarifa prej 800 kilovatësh në muaj, nga 7.79 centë ka arritur në 9.05 centë për kilovat.

Tarifa e natës, për ata që shpenzojnë më pak se blloktarifa prej 800 kilovatësh në muaj, nga 3.34 centë ka arritur në 3.88 centë për kilovat.

Për kilovatët e shpenzuar mbi blloktarifën prej 800 kilovatësh, çmimi për tarifën e ditës ka kaluar nga 13.29 centë në 15.43 centë, ndërsa ajo e natës nga 6.27 centë në 7.28.

Para pak ditësh, Richard Grenell, i dërguari për Misione të Veçanta i presidentit të Shteteve të Bashkuara të Amerikës Donald Trump, ditë më parë bëri thirrje që t’i ndalen fondet Dhomave të Specializuara, përcjell albinfo.ch.

Grenell kishte deklaruar se kjo gjykatë është politike dhe se janë shpenzuar dhe shpërdoruar miliardat.

Ndërkohë Dhomat e Specializuara të Gjykatës së Hagës, i janë kundërpërgjigjur Grenellit.

Në një përgjigje nga DhSK-ja, zëdhënësja Angela Griep, deklaroi se kjo gjykatë është e pavarur dhe e paanshme.

Ajo theksoi se janë plotësisht të përqendruar në zbatimin e plotë të mandatit që kanë Dhomat e Specializuara.

“Dhomat e Specializuara janë plotësisht të përqendruara në zbatimin e mandatit të saj për të garantuar gjykime të drejta, të paanshme dhe të sigurta, pavarësisht nga çdo zhvillim apo koment politik”, tha ajo për Klankosova.tv.