Calmy-Rey: Nuk kemi shkelur rregullat e neutralitetit

Presidentja dhe ministrja e jashtme e Zvicrës, Micheline Calmy-Rey ka arsyetuar qëndrimin e Qeverisë Federale për të lejuar kalimin e trupave të huaja ushtarake nëpër territorin dhe hapësirën ajrore të Zvicrës. Bëhet fjalë për trupat e shteteve perëndimore që përgatiteshin për të sulmuar caqet në Libi.

Sipas saj, kjo leje nuk përbën shkelje të neutralitetit të Zvicrës.

Calmy-Rey këtë e ka thënë në një intervistë të saj për gazetën e sotme „Sonntagsblick”. Ajo ka shtuar se me këtë veprim Zvicra nuk është bërë palë ndërluftuese dhe po ashtu nuk ka vënë në lojë besueshmërinë e saj.

Sipas Rey, neutralitet do të thotë që Zvicra nuk ka të drejtë të marrë pjesë në një luftë në mes shtetesh. Por, ka thënë ajo, Këshilli i Sigurimit i OKB-së nuk mund të konsiderohet palë në konflikt.