Barometri i fundit para zgjedhjeve: Pa ndryshime në radhitje

SVP-UDC dhe SP-PS, kanë secila nga 0.4% më shumë përkrahës se sa kanë pasur në zgjedhjet e vitit 2007

Barometri fundit politik, para zgjedhjeve që mbahen më 23 tetor, nuk ka ndryshuar asgjë në radhitjen e partive politike që konkurrojnë për vende në Parlamentin e Zvicrës. Ndryshime të vogla kanë ndodhur vetëm në përqindjet që pritet t`i marrin partitë përkatëse.

Kështu, SVP-UDC dhe SP-PS, kanë secila nga 0.4% më shumë përkrahës se sa kanë pasur në zgjedhjet e vitit 2007. SVP-UDC, që vazhdon të jetë partia numër një me diferencë të madhe nga të tjerat, në vitin 2007 kishte fituar 28.9% të votave të zviceranëve që kishin marrë pjesë në zgjedhje, ndërsa, sipas barometrit të bërë nga gfs.bern, tash do t`i fitonte 29.3%.

Nga ana tjetër SP-PS në vitin 2007 kishte 19.5 ndërsa tash do të kishte për vete 19.9 % të trupit votues zviceran.

Humbje serioze në krahasim me katër vite më parë, për plot 2.5% më pak, do të pësonte FDP-ja (liberalët) me 15.2%. Ndërsa CVP-PDC do të kishte një humbje simbolike prej 0.3% në krahasim me vitin 2007 (Nga 14,8% në 14.5%).

Po kaq, -0.3% më pak se në zgjedhjet e kaluara do të fitonte edhe Partia e Gjelbër, gjegjësisht 9.3%.

Fituesit e vërtetë të zgjedhjeve 2011 do të ishin, bazuar në barometrin e fundit zgjedhor, Partia e Gjelbër Liberale, e cila nga 1.4% do të kalonte në 4.9% ose do të trefishonte veten, dhe BDP, e cila në zgjedhjet e kaluara ende nuk ishte themeluar ndërsa tash do të fitonte 3.6% të votave të zviceranëve.

Sipas analistëve të zgjedhjeve, përqendrimi në qendrën e spektrit politik, i një numri të madh të partive, krahas partive tradicionale FDP dhe CVP-PDC, bërë që këto dy parti të kenë frikë për elektoratin e tyre të mëparshëm. Atë ua rrezikojnë para së gjithash partitë e reja, si BDP dhe Të Gjelbrit Liberalë.