Ambasadori gjerman: Kërkesa për draft-statutin e Asociacionit për anëtarësimin në KiE nuk është surprizë për Kurtin

Foto Twitter: @GermanAmbKOS

Ambasadori i Gjermanisë në Kosovë, Jorn Rohde, është shprehur se Gjermania e do Kosovën në Këshillin e Evropës, por sipas tij duhet një shumicë prej dy të tretave të shteteve anëtare për ta siguruar këtë.

Ai ka thënë se në qendër të Këshillit të Evropës është mbrojtja e pakicave, dhe në këtë kontekst, sipas tij, zbatimi i vendimit për Manastirin e Deçanit ishte një hap i rëndësishëm.

“Megjithatë, themelimi i Asociacionit të Komunave me Shumicë Serbe është gjithashtu një çështje shumë e rëndësishme për të cilën Kosova është përkushtuar tashmë në marrëveshjet e Brukselit të vitit 2013 dhe 2015 dhe në marrëveshjet e Ohrit. Ne mendojmë se nga një numër bisedash që kemi pasur, ia kemi bërë të qartë Qeverisë së Kosovës që një votim i suksesshëm, ka nevojë për hapa të mëtejshëm për ta siguruar këtë shumicë prej dy të tretash. Megjithatë, këto hapa të nevojshëm ende nuk janë ndërmarrë dhe keni parë deklarata edhe nga partnerët e QUINT-it se një hap i tillë i domosdoshëm mund të jetë dhe duhet të jetë dërgimi i këtij draft-statuti në Gjykatën Kushtetuese. Dhe në këtë sfond, mendoj se ende nuk është vënë në rend dite aplikimi i Kosovës për anëtarësim”, ka deklaruar ai për A2CNN.

Ndër të tjera, ai u shpreh se nuk bëhet fjalë për mungesë anëtarësie të Kosovës në KiE, por sipas tij, Gjermania do një votë të sigurt, ndërsa tha se kërkesa që e lidhë anëtarësimin e Kosovës në KiE nuk është surprizë për kryeministrin e Kosovës, Albin Kurtin.

“Dhe kryeministri, siç e kemi thënë publikisht unë dhe të tjerët, ka pasur biseda me liderët politikë, me presidentin Macron, me kancelarin Scholz. Ai u takua me ministrin tim të jashtëm më 26 prill dhe ne gjithmonë, të gjithë, i kemi dhënë Kosovës pritshmëri të qarta për këtë temë. Pra, nuk është një surprizë. Dhe e kemi thënë edhe publikisht, një votim i dështuar do të ishte një fatkeqësi. Pra, ne duam Kosovën në Këshillin e Evropës dhe duam një shumicë të sigurt. Dhe për ta siguruar atë, ju duhet të bëni disa hapa pozitivë, të cilët sapo i shpjegova”, ka thënë ai.

Sa i përket skenarit që Kosova t’i bashkohet Këshillit të Evropës javën e ardhshme, ai ka thënë se për këtë duhet një “vendim i guximshëm nga ana e qeverisë”.

“Ju mund të vendosni diçka në rendin e ditës në një periudhë shumë të shkurtër. Megjithatë, sa më shpejt të merret një vendim i guximshëm nga ana e qeverisë, aq më të mëdha janë shanset për të pasur një votë dhe për të pasur një shumicë të sigurt, sepse në politikë duhet të bindësh edhe vendet skeptike. Dhe do të përsëris, mendoj se do të ishte suksesi më i madh i politikës së jashtme të Kosovës që prej një dekade. Dhe, e dini, nuk do të doja asgjë më shumë se sa ta shihja Kosovën në Këshillin e Evropës sa më shpejt që të jetë e mundur”, shtoi tutje ai.