Zvicra do të kontrollojë të dhënat e pasagjerëve ajrorë, ja çfarë duhet të dinë udhëtarët

Zvicra do të nisë përdorimin e të dhënave të pasagjerëve ajrorë për të luftuar terrorizmin dhe krimet e rënda. Sistemi i ri do të përfshijë të dhënat që udhëtarët japin gjatë rezervimit ose check-in-it për fluturimet që lidhen me Zvicrën.

Këshilli Federal ka vendosur që Ligji për të dhënat e pasagjerëve ajrorë të hyjë në fuqi më 1 nëntor 2026. Ndërsa nga 1 shkurti 2027, Njësia e Informacionit për Pasagjerët, e vendosur pranë Zyrës Federale të Policisë, fedpol, do të nisë përpunimin e të dhënave të njohura ndërkombëtarisht si “Passenger Name Record”, PNR, përcjell albinfo.ch.

Të dhënat PNR përfshijnë emrin dhe mbiemrin e pasagjerit, të dhënat e kontaktit, adresën dhe numrin e telefonit, datën dhe itinerarin e udhëtimit, si dhe informacione për bagazhin, mënyrën e pagesës dhe personat me të cilët udhëton. Udhëtarëve nuk do t’u kërkohet të japin informacione shtesë për shkak të sistemit të ri. Kompanitë ajrore do t’ua transmetojnë autoriteteve vetëm të dhënat që tashmë i marrin gjatë rezervimit ose check-in-it.

Sipas fedpol, këto të dhëna do të mund të përdoren vetëm për luftimin e terrorizmit dhe krimeve të rënda. Informacionet veçanërisht të ndjeshme, si origjina etnike, bindjet politike ose fetare, gjendja shëndetësore dhe orientimi seksual, nuk bëjnë pjesë në të dhënat PNR.

Të dhënat do të krahasohen me bazat policore dhe listat përkatëse, ndërsa çdo përputhje do të kontrollohet manualisht përpara se informacioni t’u përcillet autoriteteve kompetente. Të dhënat që nuk tregojnë lidhje me terrorizmin apo krimet e rënda do të pseudonimizohen automatikisht pas një muaji.

Sistemi do të vendoset gradualisht. Në vitin 2027, njësia e fedpol do të nisë punën me tetë punonjës dhe kapacitet të kufizuar, ndërsa zgjerimi i mëtejshëm është planifikuar në vitet pasuese. Autoritetet zvicerane theksojnë se PNR përdoret prej vitesh në shumë vende si instrument për luftimin e terrorizmit dhe formave të rënda të kriminalitetit.

 

---