Rrjeti i Bizneseve të Diasporës Shqiptare në Zvicër do të bëjë bashkë odat ekonomike të Kosovës, Shqipërisë dhe Maqedonisë së Veriut

Rrjeti i Bizneseve të Diasporës Shqiptare në Zvicër do të bëjë bashkë odat ekonomike të Kosovës, Shqipërisë dhe Maqedonisë së Veriut, me synim forcimin e bashkëpunimit ekonomik dhe krijimin e lidhjeve të reja ndërmjet bizneseve shqiptare në diasporë dhe atyre në vendet e rajonit.

Këtë e ka bërë të ditur Fehmi Fetahi, president i Bordit të Rrjetit të Bizneseve të Diasporës Shqiptare në Zvicër, i cili theksoi se qëllimi kryesor i këtij organizimi është rrjetëzimi i kompanive, shkëmbimi i përvojave dhe krijimi i mundësive të reja për investime dhe partneritete ekonomike.

Sipas Fetahit, diaspora shqiptare në Zvicër përfaqëson një potencial të madh ekonomik dhe përmes këtij rrjeti synohet që bizneset shqiptare të lidhen më ngushtë me tregjet e Kosovës, Shqipërisë dhe Maqedonisë së Veriut.

Ai ka nënvizuar se bashkëpunimi ndërmjet odave ekonomike do të ndikojë pozitivisht në zhvillimin e projekteve të përbashkëta, promovimin e investimeve dhe fuqizimin e rolit të diasporës shqiptare në ekonominë rajonale.

Ngjarja do të mbahet më 17 tetor në Langenthal, duke filluar nga ora 17:00, ku pritet pjesëmarrja e përfaqësuesve të odave ekonomike, afaristëve dhe investitorëve shqiptarë nga Zvicra dhe rajoni.

Agjenda dhe lokacioni i saktë i ngjarjes do të bëhen publike shumë shpejt.

Rrjeti i Bizneseve të Diasporës Shqiptare në Zvicër po vazhdon aktivitetet e tij në funksion të krijimit të platformave të bashkëpunimit ndërmjet afaristëve shqiptarë në diasporë dhe institucioneve ekonomike në trojet shqiptare.

Lexoni po ashtu:

Kosova mund të përfitojë më së shumti investime nga bizneset e shqiptarëve të Zvicrës