Shkollat me klasa të mbipopulluara

Në disa kantone fillon viti i ri shkollor të hënën. Një studim i "Sonntagszeitung" tregon se në shumë shkolla fillore të Zvicrës ka mungesë të hapësirës

Të hënën në disa kantone zvicerane fillon mësimi me klasa të improvizuara dhe të mbipopulluara me nxënës.

Sipas një raporti të «Sonntagszeitung», shumë shkolla fillore ankohen për mungesë të  hapësirës. Gazeta «Sonntagszeitung» thotë të ketë intervistuar para fillimit të shkollës rreth 1 mijë shkolla fillore.

186 drejtorë shkollash janë ankuar për mungesë të hapësirës. Një drejtor shkolle në Kantonin e Cyrihut ka raportuar se në shkollën e tyre 35 fëmijë janë dërguar në një apartament 3 dhomësh gjatë gjithë ditës.

Problemin me hapësirë nëpër shkolla e ka konfirmuar kryetari i Shoqatës së drejtorëve të shkollave të Zvicrës, Bernard Gertsch.  Tani komunat duhet të investojnë.

Kryetari i Federatës së shoqatave të mësuesve të Zvicrës, Beat W. Zemp, bën thirrje për një planifikim të arsimit të fortë dhe afatgjatë”. Siç raporton «Sonntagszeitung», numri i nxënësve të shkollave fillore do të vazhdojë të rritet deri më 2021, deri në 62 mijë nxënës.