Vrasje në mes vëllezërish, shkas: ndarja e trashëgimisë

Shkak për këtë vrasje ka qenë konflikti në mes të tre vëllezërve dhe motrës për shtëpinë familjare dhe pasurinë bujqësore që ua kishin lënë prindërit

Një zviceran i moshës 48 vjeçare i ka shkaktuar plagë të rënda nga një goditje me arme zjarri në Bürsserach të Solothurnit vëllanë  e vet 55 vjeçar, i cili ka vdekur pastaj në spital. Dorasi është arrestuar. Ai ka pranuar se ka qëlluar me armë drejt vëllait të tij, bën të ditur Policia e kantonit të Solothurnit.

Sipas njohurive të deritashme, shkak për këtë vrasje ka qenë konflikti pronësor në mes të tre vëllezërve dhe motrës. Prindërit u kishin lënë atyre shtëpinë familjare dhe pasurinë bujqësore në fshat, ndarja e së cilës ka shërbyer si mollë sherri në mes të vëllezërve.

Vëllai më i ri banonte në shtëpinë familjare që u takonte të gjithëve dhe refuzonte të paguante një qira simbolike të cilën ia kërkonin vëllezërit, shkruan 20minuten.ch.

Kjo kishte çuar te mosmarrëveshjet që kanë kulmuar me vrasje, thonë fqinjët dhe të njohurit tjerë të familjes.

Policia dhe prokuroria e përgjithshme ndërkohë e kanë iniciuar një procedurë hetimesh lidhur me vrasjen.