Prokuroria e Kosovës shqyrton 133 raste për parregullsitë në zgjedhje

Me kërkesë të kryeprokurorit të Shtetit, Ismet Kabashi, të gjitha këto lëndë nga prokurorët kompetent, do të shqyrtohen me prioritet

Paneli Zgjedhor për Ankesa dhe Parashtresa në Kosovë i ka dërguar Prokurorisë së Shtetit 133 raste, përmes së cilave subjektet politike kanë paraqitur ankesa lidhur me parregullsitë që kanë shënuar procesin e zgjedhjeve të parakohshme parlamentare, të mbajtura më 12 dhjetorit 2010 në Republikën e Kosovës.

Këto lëndë i janë dërguar Prokurorisë së Shtetit, pas kërkesave nga kryeprokurorët e Prokurorive Komunale të Republikës së Kosovës, drejtuar PZAP-it, për dërgimin e të gjitha rasteve, ku subjektet politike kanë paraqitur ankesa lidhur me parregullsitë që kanë shënuar procesin e zgjedhjeve parlamentare.

Me kërkesë të kryeprokurorit të Shtetit, Ismet Kabashi, të gjitha këto lëndë nga prokurorët kompetent, do të shqyrtohen me prioritet, njoftojnë mediat në Prishtinë.