Besa shqiptare, shpëtim për hebrenjtë

Ekspozita u kushtohet shqiptarëve që shpëtuan hebrenjtë gjatë Luftës së Dytë Botërore dhe është titulluar "Besa-një çështje nderi"

Duke filluar nga viti 2006, në Vaduz të Principatës së Liechtenstein-it, mbahet një ditë kujtimi për viktimat e Holokaustit. Shënimin e një dite të tillë, e patën shpallur më 2003 ministrat e arsimit të vendeve anëtare të Këshillit të Evropës. Ata patën vendosur që me rastin e kësaj dite, nëpër shkollat e këtyre vendeve të përkujtohen dhe nderohen viktimat e holokaustit dhe të krimeve kundër njerëzimit.

Këtë vit, dita në fjalë, në Liechtenstein është shënuar edhe me një ekspozitë shumë të veçantë, të hapur dje në Muzeun Nacional. E veçantë, për shkakun se ajo u kushtohet shqiptarëve që shpëtuan hebrenjtë gjatë Luftës së Dytë Botërore dhe është titulluar “Besa-një çështje nderi”.

Ekspozita, e cila përmban fotografi të shqiptarëve të besimit mysliman, që shpëtuan nga shfarosja hebrenjtë, është realizuar nga organizata përkujtimore e Izraelit “Yad Vashem” dhe financuar nga shoqata e miqve liechtenstenas të Yad Vashem-it.

Fotografitë janë vepër e fotografit amerikan Norman Gershman dhe ato janë prezantuar për herë të parë në ndërtesën e OKB-së, në Nju Jork në vitin 2008.

Ekspozitën “Besa…” e ka hapur Aki Rav-On, drejtor i Yad Vashem për vendet gjermanishtfolëse, raportojnë mediet e Liechtensteinit dhe ato të Zvicrës. Ai, në fjalën e tij ka vënë në dukje guximin e jashtëzakonshëm qytetar të shqiptarëve të besimit mysliman, të cilët kanë shpëtuar jetët e njerëzve, pa menduar për religjionin dhe nacionalitetin e tyre. Atëbotë kuraja qytetare ka qenë dukshëm më e vështirë, ka theksuar ai më tutje.

Njerëzit do të duhej që edhe në kohën e sotme të mos mbyllnin sytë dhe të reagonin ndaj padrejtësive.

Ekspozita “Besa, një çështje nderi”, mbetet e hapur deri më 4 mars në Landesmuseum, Vaduz.