Protestë kundër ekstradimit të Shemsi Nuhiut në Serbi

Protesta është paralajmëruar për javën e ardhshme para Ambasadës së Zvicrës në Prishtinë

Më 28 dhjetor, Organizata e Veteranëve të Luftës së ish UÇPMB-së, në bashkëpunim me Shoqatën “Vatra”  kanë paralajmëruar një protestë para Ambasadës së Zvicrës në Prishtinë për të kundërshtuar ekstradimin e Shemsi Nuhiut nga Zvicra në Serbi.

„Ju ftojmë që të merrni pjesë në protestën që do të mbahet më datë 28.12.2011, e mërkurë në ora 13.00, para ambasadës së Zvicrës në Prishtinë, në mbështetje të ish-ushtarit të UÇPMB-së“, thuhet në një njoftim të këtyre organizatave, transmetojnë mediet në Preshevë.

Ditë më parë edhe komiteti kundër ekstradimit të Shemsi Nuhiut në duart e organeve serbe, ua ka dorëzuar peticionin autoriteteve zvicerane pëkatësisht Ministrisë së Drejtësisë në Bernë. 

Peticioni është nënshkruar nga 5152 persona, shqiptarë dhe të tjerë, në Zvicër, të cilët kundërshtojnë ekstradimin e tij në Serbi. 

Për ekstradimin në Serbi të ish-ushtarit të UÇK-së, Shemsi Nuhiut ka vendosur Gjykata Penale Federale në Bellinzona të Zvicrës. 

Por kjo nuk është instanca e fundit e gjyqësisë në Zvicër. Avokatët e Shemsi Nuhiut kanë parashtruar ankesë kundër këtij vendimi, me të cilin pas disa muajve do të merret edhe Gjykata Federale me seli në Lozanë, që është instanca më e lartë e gjyqësisë zvicerane. 

Më 14 prill autoritetet zvicerane kanë arrestuar shtetasin e Kosovës Shemsi Nuhiun me prejardhje nga Lugina e Preshevës dhe me qëndrim të rregullt në Vevey, kantoni Vaud. 

Arrestimi i tij është bërë duke u bazuar në një aktakuzë të autoriteteve të Serbisë dhe ajo e ngarkon atë për krime lufte, të kryera, sipas saj, në Kosovë.