Vritet shqiptari, dyshohen tre shqiptarë

Të dyshuarit: shoqëruesi i tij 28 vjeç shqiptar, gruaja e këtij të fundit dhe një shqiptar 24 vjeç nga Kosova

Në mbrëmjen e të enjtes në Wels të Austrisë është njoftuar për vrasjen me armë zjarri të një të riu 29 vjeçar. Sipas të dhënave më të reja të policisë, i vrari është me shtetësi shqiptare. Ndërsa ata që dyshohen për vrasjen, janë shoqëruesi i tij 28 vjeç, po ashtu shqiptar dhe gruaja e këtij të fundit. Të dy po mbahen në arrest.

Shqiptari tashmë i vrarë, ishte sjellë në spital, mbrëmë rreth orës 20. Por, me gjithë ndërhyrjen kirurgjike ai kishte ndërruar jetë nga plumbat që i kishin shkaktuar gjakderdhje të brendshme.

Po kështu, sipas njoftimeve të policisë, janë gjetur gjurmë gjaku që shpienin nga vendi i ngjarjes deri në banesën e një shqiptari 24 vjeç nga Kosova. Te ky i fundit është gjetur një revole. Edhe kosovari është arrestuar dhe hetimet po vazhdojnë, njofton Passauer Nachrichten, në versionin e saj online.