Ammann: Nuk ka pako ndihmash për ekonominë

Vetëm gjatë dhjetë ditëve të fundit kanë ardhur 130 kërkesa të firmave të ndryshme për ndihma financiare

Nuk do të ketë njëherë për njëherë “pako ndihme” për ekonominë zvicerane, të goditur nga frangu i fuqishëm. Këtë e ka thënë ministri zviceran i ekonomisë, Johann Schneider-Ammann për gazetën “Matin Dimanche”.

Sipas tij, duhet që së pari të priten efektet e pakos së parë të ndihmave. Ajo qe miratuar nga Parlamenti Federal në fillim të sesionit të tij vjeshtor dhe përbëhej nga 870 milionë franga.

“Ne po presim derisa të shpaloset i gjithë efekti i saj”, ka thënë Ammann.

Departamenti që drejton ai, ka marrë shumë kërkesa nga firma të ndryshme për mbështetje financiare. Vetëm gjatë dhjetë ditëve të fundit në adresë të tij kanë ardhur 130 kërkesa të tilla.