20`000 nënshkrime kundër ndihmave emergjente për azilkërkuesit

“Regjimi i ndihmës emergjente prodhon njerëz pa letra”, thuhet në komunikatën e organizatave që kanë organizuar peticionin

Mbi 20`000 persona kanë nënshkruar peticionin për përmirësimin e gjendjes së refugjatëve që marrin ndihma emergjente. Katër organizata humanitare kanë dorëzuar këtë peticion të marten te ministrja e drejtësisë, Simonetta Sommaruga, shkruan swissinfo.ch.

Organizatat Amnesty International, Solidarité sans frontières, Qendra Mbikëqyreëse e Zvicrës për të drejtën e azilit dhe të huajve si dhe Schweizerische Flüchtlingshilfe që nga shkurti i këtij viti kanë udhëhequr fushatën e mbledhjes së nënshkrimeve.

“Ndihma emergjente: një qorrsokak për të gjithë” ka qenë motoja me të cilën kanë protestuar këto organizata gjatë gjithë kohës, kundër kushteve të mjerueshme në të cilat detyrohen të jetojnë azilkërkuesit e refuzuar. Ata,duke filluar nga viti 2008 janë përjashtuar nga ndihmat e rregullta sociale. Në emër të “ndihmës emergjente” ata marrin, varësisht nga vendi, deri në 4.30 franga në ditë.

Sipas komunikatës së katër organizatave, “strategjia e tillë e represionit nuk e ka arritur qëllimin e saj. Përfituesit e këtyre ndihmave, përkundër regjimit të ashpër e tendencioz të ushtruar nga autoritetet zvicerane, nuk janë bindur që të kthehen në vendet e tyre.

Ka ndodhur e kundërta: numri i përfituesve kohëgjatë të ndihmave emergjente ka ardhur duke u rritur. Shumë syresh me kohë kalojnë në ilegalitet. “regjimi i ndihmës emergjente prodhon njerëz pa letra”, thuhet në komunikatën e organizatave që kanë organizuar peticionin.