Humb jetën kosovari gjatë punës

29 vjeçari nga Kosova qe rrëzuar nga shkallët, të shtunën, gjatë pastrimit të dritareve të një ndërtese në Bernë

Të dielën në mbrëmje ka vdekur në Bernë nga plagët e marra gjatë punës një punëtor kosovar i një ndërmarrjeje të pastrimit. 29 vjeçari nga Kosova qe rrëzuar nga shkallët, të shtunën, gjatë pastrimit të dritareve të një ndërtese në Bernë, shkruan bielertagblatt.ch.

Ishte ora 11.30 kur një kolegë i tij i punës kishte dëgjuar një krismë të fuqishme dhe pas kësaj e kishte parë kosovarin të shtrirë para dyerve të bodrumit të ndërtesës. Lartësia nga e cila ishte rrëzuar ishte tri metra, kanë konstatuar hetimet e bëra deri më tash.

Si pasojë e rrëzimit, ai kishte pësuar lëndime të rënda në kokë dhe ishte dërguar në spital, ku, një ditë më vonë kishte ndërruar jetë.

Hetimet për rrethanat e aksidentit tragjik janë duke vazhduar.