Një projektligj për ndalimin e shërbimit mercenar

Shkas për këtë kanë qenë raportet për kompaninë “Aegis Group” në Bazel, personeli i të cilës është i angazhuar në Irak dhe në Afganistan

Zvicra do të duhej të ndalojë firmat që merren me ndërmjetësimin e mercenarëve, ose ushtarëve apo luftëtarëve me pagesë. Kjo do të ndodhë nëse do të miratohet projektligji të cilin Qeveria Federale e ka kaluar për miratim. Bëhet fjalë për firmat, kompanitë të cilat ofrojnë shërbime private të sigurimit fizik në botën e jashtme, njofton sf1.

Në bazë të këtij projektligji, në të ardhmen do të ndalohet që njerëz të rekrutuar në Zvicër nga firmat e tilla të përfshihen në mënyrë të drejtpërdrejtë në konfliktet e armatosura në botën e jashtme. Qeveria po ashtu dëshiron të ndalojë edhe firmat të cilat për destinime të tilla rekrutojnë, aftësojnë, ndërmjetësojnë ose vejnë në dispozicion personel të sigurisë nga Zvicra.

Duhet të ndalohen gjithashtu edhe shërbimet e sigurisë nga Zvicra, të cilat janë të ndaluara për shkakun se shkelin rëndë të drejtat e njeriut. Ligji do të duhej të vlente edhe për ndërmarrjet me seli në Zvicër por që jashtë Zvicrës kontrollojnë ndërmarrje të sigurisë.

Qeveria po ashtu parashikon një regjistrim të detyrueshëm për firmat private të sigurisë të cilat ofrojnë shërbime nga Zvicra jashtë vendit. Me këtë rast autoritetet do të vërtetojnë nëse veprimtaritë e tyre janë në përputhje me ligjin ose jo. Projektligji parasheh dënime deri në tre vjet heqje lirie për veprimet që do të shpallen të ndaluara.

Shkas për debat në lidhje me kompanitë që ofrojnë shërbime të sigurisë apo “ushtritë private” kanë qenë raportet lidhur me kompaninë britanike “Aegis Group” në Bazel. Personeli i kësaj kompanie është i angazhuar veç tjerash në Irak dhe në Afganistan.

Janë gjithsej rreth 20 firma zvicerane që ofrojnë shërbime sigurie.