Kroacia hap dyert për Kosovën

Kosova ka marrë mbështetje nga shteti kroat se do të ndihmohet në procesin e liberalizimit të vizave

Gjatë qëndrimit në Kroaci, ministri i Jashtëm i Kosovës, Enver Hoxhaj ka marrë mbështetje nga zyrtarët e shtetit kroat se Prishtina do të ndihmohet në procesin e liberalizimit të vizave, ndërsa tregu kroat do të jetë I hapur për prodhimet kosovare.

Ministri Hoxhaj dhe homologu kroate, Gordan Jandrokoviq kanë biseduar sot në Zagreb rreth anëtarësimin të Kosovës në nismat e ndryshme rajonale dhe ndërkombëtare.

Në kuadër të bashkëpunimit të ngushtë në të gjitha fushat, Hoxhaj ka veçuar bashkëpunimin në ekonomi, tregti, kulturë, arsim dhe sport.

“Tregu i Kroacisë do të jetë i hapur për investime dhe produkteve kosovare”, ka thënë ministri Hoxhaj, thuhet në një komunikatë të Ministrisë së Punëve të Jashtme të Kosovës.

Shefi i diplomacisë kosovare thënë se do të nënshkruhen shumë marrëveshjeve të bashkëpunimit në fusha të ndryshme ndërmjet Kosovës dhe Kroacisë.

“Gjatë këtyre viteve kemi mbledhur një përvojë të jashtëzakonshme rreth këtyre dy proceseve.Pikërisht këtë përvojë dhe këtë ekspertizë dëshirojmë t’ia japim Kosovës në mënyrë që rruga e saj drejt BE-së të jetë më e shkurtër dhe më e shpejt se jona”, ka thënë ministri Jandrokoviq.

Gjatë ditës, ministri Hoxhaj është takuar edhe me zëvendëskryeministrin Petar Çobankoviq, i cili njëkohësisht është edhe ministër i Bujqësisë, si dhe me kryetarin e Kuvendit të Kroacisë, Luka Bebiq.