Shtim rekord i dënimeve në trafik

Gjatë vitit 2010 u janë marrë lejet e drejtimit 79`000 personave, që është 5.4 për qind më shumë se në vitin pararendës

Zviceranët ngasin gjithnjë më shpejtë dhe me më pak kujdes veturat e tyre. Kështu kuptohet nga njoftimi i Entit Federal për Rrugët (ASTRA)i bërë publik sot. Sipas entit në fjalë, gjatë vitit 2010 u janë marrë lejet e drejtimit të automjetit 79`000 personave, që është 5.4 për qind më shumë se në vitin pararendës.

Shumica e dënimeve kanë ardhur për shkak se ngasësit kanë ngarë tepër shpejt automjetet, ndërsa rritje ka shënuar edhe numri i atyre që kanë ngarë veturën në gjendje të dehur.

Ngasja e makinës duke përdorur njëkohësisht telefonin mobil, është një ndër shkaqet në rritje të marrjes së lejes për vozitje, shkruan nzz.ch.

Grupmosha më e prirur për ngasje të padisplinuar është ajo në mes 20 dhe 29 vjeçe.

Ndërsa është shënuar edhe ekstremi tjetër; janë regjistruar 22% më tepër të moshuar, mbi 70 vjeçarë, të cilëve u janë marrë lejet e drejtimit, si pasojë e mos respektimit të rregullave në komunikacion.

Në shumicën e rasteve, ngasësve u janë marrë lejet e drejtimit të automjeteve për një afat nga një deri në tre muaj.