Shkëlzen Gashi, nga mbret i golave në rezervist

Në dy vitet e kaluara ishte golashënuesi më i mirë i Zvicrës ndërsa këtë vit kohën më të madhe po e kalon si rezervist

Futbollisti shqiptar i Bazelit, Shkëlzen Gashi është duke përjetuar një periudhë mjaft të vështirë në klubin e Bazelit. Fituesi i “Këpucës së artë” për dy sezonet e kaluara duket se është i parëndësishëm më për kampionin e Zvicrës.

“Në sezonin e kaluar 2014/15 ishte mbreti i golashënuesve, ndërsa në sezonin e ri nga 29 ndeshje, 27 vjeçari ka luajtur vetëm në 18 të tilla (1122 minuta/ 6 gola) – prej të cilave tre gola i shënoi me amatorët e Muttenz-it,” shkruan potaali zviceran 20min.ch.

Situata nëpër të cilën po kalon mesfushori i kombëtares shqiptare sipas medieve zvicerane ka të bëjë edhe me ndërrimin e trajnerit.

Trajneri aktual Urs Fischer, i cili trashëgoi këtë sezon postin e Paulo Souzas,  nuk e pëlqen shumë në përbërjen e parë djaloshin nga Çabiqi i Klinës. Madje, mungesën e Shkëlzenit, ai e ka arsyetuar duke thënë se skuadra e tij po fiton ndeshjet radhazi dhe që sipas tij formacionet që hedh në fushë janë duke pasur suksese, përcjell albinfo.ch

Në anën tjetër shumë analistë zviceranë tash e sa kohë thonë se Gashi duhet të largohet nga Bazeli dhe nuk duhet ta humb ritmin e tij të golave. Mungesa e tij në pjesën më të madhe të sezonit mund të rrezikojë edhe pjesëmarrjen e tij me kombëtaren shqiptare në Kampionatin Evropian, ndonëse ishte ndër më meritorët për kualifikimin e Shqipërisë.

Trajneri i kombëtares shqiptare Giani De Biasi ua ka bërë të ditur lojtarëve se në Francë do të udhëtojnë vetëm ata që janë në top formë dhe për këtë secili lojtar duhet të tregojë kualitete të skuadrat e tyre përkatëse.

Se çfarë vendimi do të marrë Gashi gjatë afatit kalimtar të dimrit mbetet të shihet.

“Gjatë verës Shkëlzen Gashi refuzoi kontaktet me Lazion, Zenitin, Sevilla dhe Besiktasin,” shkruan më tej 20min.ch.