1 euro do të kushtojë 1.20 franga

Banka Kombëtare e Zvicrës (SNB) ka reaguar ashpër sot për të stabilizuar frangun në kurset e këmbimit

Një euro përfundimisht do të ketë vlerën e 1.20 frangash. Dhe me këtë do të pëcaktohet norma minimale e këmbimit të frangut me euron. Kështu ka vendosur sot Banka Kombëtare zvicerane.

“Nuk do të tolerojmë kurse më të ulëta se ky prag “, thuhet në një njoftim të Bankës Kombëtare të Zvicrës (SNB).Kjo e fundit ka shprehur gatishmërinë për të blerë valuta të huaja në sasi të pakufizuara. Madje ka paralajmëruar masa tjera shtesë nëse rrezikohet e ardhmja ekonomike e vendit.


Mënjëherë pas vendimit, valuta  evropiane nisi të forcohet duke arritur në 1.20 franga. Në fillim të ditës, një euro ishte me vlerë më pak se 1,11 franga. Pastaj gjatë ditës erdhën lajme edhe për rimëkëmbjen e bursës zvicerane, njoftojnë agjensitë e lajmeve.Ky veprim i diskutueshëm është mirëpritur menjëherë nga të gjitha partitë e mëdha politike të vendit.

Edhe qeveria e shtetit zviceran tha se qëndron prapa këtij vendimi të Bankës Kombëtare (SNB).

Ministri i Ekonomisë, Johann Schneider-Ammann është shprehur i kënaqur me vendimin e SNB-së, që sipas tij përcakton edhe politikën e saj të pavarur monetare.

Në fillim të gushtit euro ishte këmbyer pothuajse 01:01 me frangun zviceran. Me këtë gjendje ishte goditur rënd ekonomia e vendit, veçanërisht eksportet dhe turizmi.



Disa parti politike të vendit dhe Bashkimi i Sindikatave të Zvicrës kanë kërkuar ndërhyrje tjera të SNB-së për të sjellë frangun zviceran në 1.40-1.45 franga për euro.

Për herë të parë kishte verpruar kësisoji Banka Kombëtare e Zvicrës në vitin 1978.  Atëherë frangu ishte mbivlerësuar ndaj markës gjermane, ndërsa dollari ishte dobësuar si rezultat i një krize të naftës. SNB-ja e kishte stabilzuar valutën zvicerane në 80 cent krahas markës së atëhershme gjermane.