Zvicra, edhe 30 milionë për Sirinë

Zvicra shton ndihmën e saj për refugjatët sirianë për 30 milionë franga plotësuese. Këtë shumë ajo e ka zotuar për Konferencën e Donatorëve që mbahet në Kuvajt

OKB shpreson se në Konferencën e Donatorëve për Sirinë në Kuvajt do të grumbullojë 6.5 miliardë dollarë, që do të ishte shuma më e madhe e mbledhur nga kjo organizatë në historinë e saj.

Në këtë kuadër Zvicra shton ndihmën e saj për refugjatët sirianë për 30 milionë franga plotësuese. Këtë shumë ajo e ka zotuar për Konferencën e përmendur që mbahet të mërkurën e ardhshme.

Gjendja e përkeqësuar e refugjatëve sirianë ka ngritur nivelin e përgjegjësisë së vendeve të ndryshme të botës për të ndihmuar në zbutjen e saj. Aktualisht 9.3 milionë banorë të Sirisë janë të varur nga ndihmat humanitare, që është dyfish më shumë se para një viti, ndërkohë që konflikti vetëm sa po intensifikohet.  

2.3 milionë sirianë, gjysma e tyre fëmijë, ndërkohë janë strehuar në vendet fqinje, ka bërë të ditur sot në një konferencë shtypi Bernë Manuel Bessler, udhëheqës i organizatës humanitare SKH.  Bashkësia ndërkombëtare ka detyrime për të ndihmuar vendet që po strehojnë refugjatët në fqinjësi të Sirisë, ka thënë Bessler. Ai ka shtuar se, me 5000 refugjatë që i shtohen varganit të të ikurve për çdo ditë, kemi të bëjmë me njërën ndër krizat më të rënda të refugjatëve të 20 viteve të fundit. Me këtë ritëm, në fund të vitit 2014 do të kemi 4 milionë refugjatë nga Siria, shkruan azonline.ch.

Në këtë situatë, të cilën dimri e ka bërë edhe më të rëndë, ndihma për refugjatët po bëhet më e domosdoshme. Për këtë arsye ndihmat zvicerane, duke e u rritur për 30 milionë franga shtesë, kanë arritur në shumën prej 85 milionë fragash nga marsi i vitit 2011.

/albinfo.ch/