Zogjtë në motor penguan fluturimin e aeroplanit nga Cyrihu në Prishtinë

gjatë nisjes së fluturimit, motori i aeroplanit A320  “u sulmua” nga zogjët. Një ose më shumë zogj ngelën në motorin e fluturakes

Të shtunën e kaluar, një aeroplan i kompanisë zvicerane Edelweiss, në vend se të vazhdonte fluturimin drejt Prishtinës, për ku ishte nisur, u kthye në Cyrih, pas 65 minutash fluturim. Kjo kohë i është dashur avionit për të djegur kerozinën, duke fluturuar mbi Schwarzwald, Gjermani. albinfo.ch ka shkruar të shtunën lidhur me dështimin e këtij fluturimi por atë ditë nuk diheshin ende arsyet e dështimit.

Por, çfarë ndodhi në të vërtetë dhe si u bë që fluturakja të mos vazhdonte rrugën drejt jugut?

Siç shkruan portali “Aviation Herald”, të cilit i referohet blick.ch, gjatë nisjes së fluturimit, motori i aeroplanit A320  “u sulmua” nga zogjët. Një ose më shumë zogj ngelën në motorin e fluturakes. Për pasojë, personeli konstatoi se  në njërin nga motorët kishte vibracione kështu që vendosi kthimin në aeroportin e nisjes.

“Në asnjë moment nuk ka pasur rrezik për pasagjerët dhe për personelin”, ka thënë një zëdhënëse e pyetur nga blick.

“Përgjatë 45 minutave, aeroplani ynë ishte i detyruar të digjte kerozinën në mënyrë që të mundte sërish të aterronte. Për këtë është bërë gjithë ai fluturim mbi regjionin Schwarzwald të Gjermanisë. Pastaj makina është kthyer në aAeroportin e Cyrihut, në Kloten, ku udhëtarët kanë kaluar në një aeroplan tjetër, transmeton albinfo.ch. Në Kosovë kanë arritur me tri orë vonesë.

---