Zëdhënësi i KQZ-së: Mërgimtarët mund të regjistrohen në tri mënyra për të votuar në zgjedhje

Zëdhënësi i Komisionit Qendror të Zgjedhjeve, Valmir Elezi, ka njoftuar se për zgjedhjet e 9 shkurtit 2025, mërgimtarët mund të regjistrohen në tri mënyra.

Sipas tij, për votuesit që jetojnë jashtë Kosovës, së shpejti do të jetë e qasshme platforma elektronike për periudhën e regjistrimit për aplikim, transmeton albinfo.ch.

“Do të ketë kohë të mjaftueshëm për këtë proces, i cili do të fillojë më 29 gusht dhe do të përmbyllet më 26 dhjetor. Pra, për këtë periudhë mund të paraqesin aplikimin e tyre për t’u regjistruar si votues jashtë Kosove”, deklaroi ai për televizionin publik.

Tutje, ai ka thënë se mërgimtarët mund të përzgjedhin se si duan të votojnë, në mënyrë fizike nëpër përfaqësitë diplomatike, apo edhe përmes dy mënyrave të tjera: duke dërguar pakon me fletëvotim në fahun postar të KQZ-së në Kosovë apo në fahun postar të KQZ-së që do të hapet jashtë Kosovës.