Zaev: Gjuha e dytë është shqipe, nuk më pengon nëse presidenti është shqiptar

Kryeministri i Maqedonisë, Zoran Zaev, ka thënë se Ligji për gjuhët do të marrë vlerësim pozitiv edhe nga Komisioni i Venecias.

Zaevi ka thënë se atij i vjen keq nga qëndrimi i opozitës për çështjen e Ligjit për gjuhët.

“Me vetë Ligin që është miratuar dhe siç e thotë edhe Kushtetuta jonë, gjuhë e parë është gjuha maqedonase dhe gjuha tjetër e dytë është gjuha shqipe. Për këtë arsye nuk duhet të kenë dilema as maqedonasit dhe as shqiptarët, sepse pikërisht për këtë arsye është dërguar Ligji për gjuhët në Komisionin e Venecias dhe atje do të vlerësohet. Duhet të jemi fleksibil dhe të mos e shkatërrojmë të ardhmen. Më vjen keq për opozitën që po mbjell nacionalizëm. Ne nuk dëshirojmë t’i ndajmë qytetarët në përqindje, neve nuk na duhet ajo”, ka thënë Zaevi në një intervistë për Alsat.

Ai ka thënë se atij nuk do t’i pengonte që edhe presidenti të jetë shqiptar, përcjell albinfo.ch.

Zaevi deklaroi se Ligji për gjuhët do të implementohet dhe ai do të jetë qytetari i parë maqedonas që pasaporta e tij do të ketë përmbajtje edhe në gjuhën shqipe.