Kosova

VV-ja hedh hapa për votimin e mërgatës në ambasada dhe konsullata

E hënë, 8 Qershor 2020 - 17:40 albinfo.ch

Sot, një grup i deputetëve të Lëvizjes Vetëvendosje ka proceduar nismën ligjore për ndryshimin dhe plotësimin e Ligjit për Zgjedhje të Përgjithshme, përmes të cilit iu mundësohet bashkatdhetarëve që të përmbushin të drejtën e tyre kushtetuese për të votuar në ambasada dhe konsullata të Republikës së Kosovës, bëhet e ditur përmes një komunikate për media.

“Mërgata përbën më shumë se 1/3 e popullsisë së tërësishme në Kosovë. Roli dhe kontributi i bashkatdhetarëve ka qenë dhe vazhdon të jetë shumë i rëndësishëm në jetën ekonomike dhe sociale e politike në Kosovë. Rreth 700 milionë euro në vit vijnë nga mërgata. Fatkeqësisht dhe jo për fajin e saj, roli politik i mërgatës është reduktuar shumë kur bëhet fjalë përfshirjen e tyre në vendimmarrje”, thuhet në komunikatë, transmeton koha.net, përcjell albinfo.ch.

Megjithëse, thuhet tutje në komunikatë, formalisht mundësia e pjesëmarrjes në zgjedhje ju njihej, praktikisht atyre iu është pamundësuar përmes burokracisë e pengesave teknike e administrative.

“Mospërputhja e numrit të madh të bashkatdhetarëve, kontributit politik, kombëtar dhe ekonomik të tyre dhe përfshirjes në zgjedhje, duhet të marrë fund, duke u ofruar mundësi që të votojnë aty ku jetojnë, në ambasada dhe konsullata të Republikës së Kosovës”, thuhet në komunikatën e VV-së.

Me projektligjin e propozuar nga deputetët e Lëvizjes Vetëvendosje votuesit nga mërgata do ta kenë mundësinë që të realizojnë të drejtën e tyre kushtetuese që të votojnë në ambasadat dhe konsullatat e Republikës së Kosovës në vendet ku jetojnë.

 Të ngjashme

“Angazhohem për cilësi të jetës duke e ndier afër kulturën time të origjinës”

 Të tjera nga Kosova

Vetëm gjatë vitit të kaluar, 10 mijë leje të lëshuara: Kush mund të blejë armë në Kosovë dhe si parashihen dënimet?

 E-Diaspora

 Jeta në Austri